uMthunywa
Sikumbuzo Dabengwa
Siyabonga koPhezulu ngokungena kuzinga laphezulu kumfundo yaphezulu. Inengi selisithi selidume ledlula. Yebo kambe kuliqiniso ukuba akumelanga sithabe kokuphela kodwa kuhle ukuba nxa sesingenile emdibini wezemfundo wezinga laphezulu sinanzelele ukuba asitshayi umpululu kokuphela size sedlulise amalawulo.
Bakhona lalamhlanje abalokhu besedilini lokujabulela impumela yebanga lesine. Abanye sebengenile emdibini wezemfundo eqhubekela phambili. Sekuphelile okwamakhekhe lamanye amafunani. Umuntu lomuntu sekufanele abophe ziqine. Sekusetshenzwa ngoba ibanga leli bafundi lileminyaka emibili qha. Singahlolisisa kuhle ayeneli emibili ngoba esinye isikhathi sidliwa umfundi engakaqali. Akesibone nampa abafundi asebephumelele bexoxa kungakayiwa ezikolo.
a) Kusesikolo abafundi bayaxoxa ngokuvulwa kwesikolo kubanga lesihlanu kumfundo ephezulu.
John: “Ndoda, usuthengile yini izimfanelo zesikolo, wabhadala lezindleko zesikolo? Phela siyavula ngoMvulo ozayo!”
Sipho: “Ngithenga ngihlola? Mina umama omncane uthe ngibuye okweviki yonke ezayo ufuna ukungenzela idili nje sidle sijabule. Phela ungalibali John ukuba sasilala singalele sibala. Mina ngiyasidinga isikhathi sokuphumula lokujabula.”
John: “Unanzelele ndoda ungacini ususalele emuva. Thina sizabe sesijwayele wena nxa ukhona ufika.”
Sipho: “Phola mngane. Ngizafika ngingena kuhle, ungesabi.”
Kambe uSipho uhlolisise kuhle ngalindaba ayitshoyo ukuba ayechitha ithuba kujatshulwa abanye sebeqalile izifundo? Unina omncane yebo ujabulile kodwa nxa sebevulile abanye kudinga kuxhunyanwe labanye ukuze umfundi angasaleli emuva.
Asihlolisiseni nampa abanye abafundi abazixoxelayo ngokuvulwa kwezikolo kulabo abaya kubanga lesihlanu emfundweni yaphezulu.
b) Peter: “Siyavula mngane kuleli iviki elizayo. Kambe nga amalungiselelo ahamba njani ngakuwe Sam.”
Sam: “Thula wena. Bekuyisiphenquphenqu kusukela impumela iphuma bantu. Umama lobaba abazange baphozise amaseko. Bahle baqala ukuqoqa izimfanelo zonke zesikolo ngikhuluma nje izindleko zesikolo umdala usebhadele. Angikhulumi ngezingwalo lokunye okufunekayo kuzifundo zeSayensi. Sekuthengiwe, sekusele ukuba ngikudobhe ngiqonde esikolo. Phela bathi kufanele sibophe ziqine, funa ilukhuthe ugatsha indwangu.”
Peter: “Ngakhona mfokaMoyo.”
Siyananzelela bafundi ukuba sisuka ngesiqubu esehlukeneyo ekufundeni lapha. Kuqakathekile-ke ukuba umfundi azazi yena uqobo lwakhe, alandele indlela ezamenza afunde kakuhle. Imvama laba abalandela abanye lomphakathi bacina bekhala izinyembezi. Odinga ukusuka ngesiqubu somvundla kasuke ngaso. Khona kuhle ukulandela izinhlelo esiziphiwa ngabezogatsha lwezemfundo. Bahlala phansi bahlole konke.
