uMthunywa
Sikumbuzo Dabengwa
Zikhona izikhathi lapho kufanele uxolise khona. Ukuxolisa nxa uthe wenza ulutho kugeza inhliziyo yakho, kubuye kulethe inhliziyo emhlophe nke kulo ohlangane lokoniwa. Kuyenzeka oxoliswayo axole. Kuyenzakala njalo ukuba oxoliswayo angaxoli aqhubeke elokhu emgwilibana.
Kudalwa yini ukuba umuntu asale elokhu engaxolanga ebambe isikhwili? Kungadalwa yindlela umaxolisa angabe exolise ngayo. Akumelanga silibale ukuba amacala awalingani ekuphileni.
Njengabafundi asinanzeleleni ukukhuba abanye bethu.
Umkhuba esiwaziyo ngothi xolisa nxa uthe wenza iphutha waphambanisa omunye. Abanye abantu abalayo imbeko kanti njalo ukwehla phansi baxolise abalalwazi lakho. Akesikhangeleni izehlakalo ezilandelayo.
Uvela wokoza izimpahla zikaKhisimusi edolobheni elikhulu lakoBulawayo. Uthwele uyasisitheka ngapha langapha. Amaphepha aphathele izidlo kanye lempahla kuyakusinda ekuhambeni kwakho ususiyagada amabhasi aqonde endlini. Ngephutha amaphepha empahla zakho athinte kancane omunye wemigulukudu elitshaya izikhwama esilindweni samabhasi ayakwenu. Nxa esizwa izimpahla zakho zimthinta aphose akuqede ngenzondo lolaka olugcwele ukufuna ukukugebenga akuthathele zonke lezozimpahla. Ngokuzonda athi…
“Wenzani wena?” Ubuza nje kuthi akwenze into emnyama, anqundwe yikuphola kwempendulo.
“Ngiyaxolisa.”
Nxa ethi uyahamba ibanga elincane kuthi qhwi engqondweni ukuba katshinganga kwenela abuye aphenduke akubuze athi….
“Wenzani wena?” Khathesi labathengisi abahlezi phansi sebehlahle amehlo bazibuza ukuba lujaha udinga ntoni kulumuntu osexolisile. Ngelizwi eligqamileyo uphinde impendulo. Khathesi kuze kuzwakale lakusacuthe esingezwayo usithi …
“Ngiyaxolisa baba!”
Ngokuyangeka okukhulu umgulukudu usuke ungasajimbanga enyamazaneni yayo evike ngokuxolisa.
Nanku esikufundayo bafundi ukuba ukuxolisa kungumanqoba. Kwesinye isikhathi abasonayo basona beqophile njengomgulukudu lo owawufuna ukuphuca impahla zalo umuntu, wehluleka ngoba exolisile.
Uyintombazane esikhulakhulile esisekolitshini. Ubuvakatshele ngekhaya ukuze uyebona abadala ngekhaya nanku wena ufunda uhlala eKolitshini.
Usubuyela lawe esikolo kodwa kunengi okuthweleyo ngebhasikiti kamaMthembu yeka. Nanti ijaha eliphuma ebhawa likumisa lithi kuhle likuphathise izidlo zakho.
Ngokunanzelela ukuba lidle amabele wale ukuncediswa. Ngenkani kaMatshakula ijaha libambe ibhasikiti litshitshe likudonsa ngamandla ekukuphathiseni. Izinyembezi lokuzonda sekuyinto esisebusweni bakho. Nxa uhlaba umkhosi kuza amapholisa ahle abophe lelijaha liqhutshwe lisiya emapholiseni.
Ufika axolise lumuntu emapholiseni. Ukuxolisa lokhu kuyemukeleka kodwa ukulala edliwa zintwala okwelanga elilodwa nje kubakhona.
Asifundeni bafundi ukuba ukuxolisa lokuxolelana kuyimfanelo ekuphileni.
