uMthunywa
Sikumbuzo Dabengwa
kusebenza ngokuzikhandla kulomvuzo bakwethu. Akukhathalekile ukuthi uphila kuyiphi indawo, kulomvuzo omuhle. Kungabe kusemaphandleni, emadolobheni. Kuyafana nje loba kukuyiphi indawo ilakho ukukukhuthaza ukuba usebenze kanzima. Akesikhangele abafundi abakumumo olandelayo sikhangelisise lapho abadabuka khona lokuba baphumelela kanjani.
a) “KuseLupane komnyama ubambile”, kutsho abadala. Emaguswini. Amatshabela made ale. Amagonde lawo made ale. Angikhulumi langezinye izihlahla ezibalisa onkamamasane, ngitsho sona kanye lesi isihlahla esiphuma uchago ekwephukeni kwaso kumbe nxa sithe sakhwexunwa. Zonke lezi izihlahla zikhula zibende kuvaleke kuthi ngci egangeni. Amagwenzi lawo ayavitsha avale isandle, iganga phela, kuhle kwene kungabonakali lutho kude le. Yiyo le indawo eyaziwa kuthiwa kusemaguswini kulandela ukwena kwaleyo ndawo ngamagusu. Akusimagusu wodwa kodwa umango osuka emadolobheni umkhulu kakhulu. Impucuko kuleziyazinsuku kusanda kuvela uZibuse yayiyivela kanci. Lanxa kwakunjalo kodwa babekhona abazali abeza layo impucuko emulini zabo ngokufundisa abantwababo ezikolo okwakufundwa uhlala khona. Yibo labo abantwana ababejika babe ngabangene lesikhuni somlilo emfuleni sibhebha baphume laso sibhebha. Babenqoba ezifundweni.
Ayisiyo yodwa lindawo kodwa siyiphatha njengomzekeliso wezinye ezikude lamadolobho kanye lempucuko lapho abafundi ababesiya esikolo beqale bayebamba indima yokulima kumbe bayehlakula bengakagezeli ukuya esikolo. Lababafundi bangelinganiswe lalaba abafundi abavukela ukuya nje esikolweni ngendlela ezilula ezilempucuko yonke edingakalayo.
Isimanga yilabo abathi bephiwe amathuba anjalo babuye badanise abazali ngezenzo ezimbi emigwaqweni lasesikolo ngokudala amacala ngokunathwayo lokubhenywayo. Selifile elihle bakwethu.
b) Kukompucuko iyavuza. Imfundo iyajuluka. Ababalisi bayaphambana kanti njalo bayalibanga kuviyo lenu ekulifundiseni. Liphiwe lapha emakhanda. Abazali labo bayafunga bayagomela ukuba ubunzima abahlangana labo ekukhuleni kwabo ngeke kwaphindwa kwababo abantwana.
Ngalokhu konke kusondezwa kulaba bafundi ukuze baphumelele babengodokotela labomanjinela. Ayisibo bonke abalonanzelelo lwenhlanhla enjalo abakuyo. Inengi elingelandaba lemfundo yabo alize lakhumbula ngekusasa efiswa yilabo abazali abafunda bethwele amagabha avuzayo, bedubeka. Aluba abazali bewubeka ucace umumo abadlula kuwo, amahlongandlebe la angaguquka ekwenzeni alethe impumela engcono kuzifundo kanye lekuziphatheni kwabo.
Ayisibo bonke abangananzeleliyo konke lokhu. Basasekhona abantwana abajabulisayo kungakhathalekile umumo abaphila bevela kuwo. Siyakhuthaza bafundi ukuba sisebenze nzima kuwowonke umumo esikuwo ukuze ikusasa yethu ibenhle.
