uMthunywa
Ophezulu Stinta
SIQHUBEKA ngogwalo lwethu ebesinanzelela khona ukulondolozwa kwesiko lesiNtu ukuthi luqhutshwa ngaluphi uhlobo.
Besikhangele ukuzehlisa kukaMaNyathi phambi komkakhe okusuke kwalahleka emzini eminengi esiyinanzelelayo kunsuku zalamuhla.
Isiko lesibili lapho esithola khona uNyembezi ezehlisile phambi kwabazali bakhe eveza inhlonipho, lapho engena endlini uyababingelela, ahlale phansi abesekhuluma labo lokho afisa ukukukhuluma, kakhulumi labazali bakhe emile ngezinyawo.
Ukuziphatha ngale indlela bekuveza Ubuntu obebukhona izolo okuyisifiso esikhulu esingavuselela isiko lobuntu kuntsha yalamhlanje.
UNyembezi esehlezi phansi walandisa udaba lwakhe, wazibika ukuthi yena wayesekhulile njalo eseyengene lomntwana bantu. Omunye wayengazibika ngokuthuma uyisekazi, ukuze kube lokukhulumisana phakathi kwakhe kanye labazali.
Ngesintu ijaha nxa selikhulile lalilungiselela ukuthatha hatshi nje ukuvuka sehlala lomntana bantu, njengalokhu esikubona kulezi nsuku, isiko lokuthathana beliqhutshwa ngesiNtu esiqondileyo kukhangelelwe ukwakhiwa umuzi oqinileyo njalo.
Sinanzelela ukuthi kulezinto ezithile ezazikhangelwa kumbe zibuzwa mayelana lentombi eyayikhangelelwe ukuthathwa izinto ezifana lokuziphatha kwentombi kanye lomuzi lapho ephuma khona.
