uMthunywa
Ophezulu Stinta – Unduku wabetha umthandazo omfitshane ezikhala ukuthi nje wayengaphuma kulolusizi eyephakathi kwalo. Esabindana lomthandazo lo lwakhala njalo ucingo khathesi ke lwalubika ukuthi kulomlayezo ongenileyo, wafunda ngezandla eziqhaqhazelayo. Umlayezo lo wawuthunyelwe nguMashobane. Wayemazisa ukuthi uba nje ilanga litshona engayilethanga imali yakhe wayezawukhomba umuzi olotshwala, wayezawubasa engawothi.
Wanxapha ngelokhonondayo ekhala ngokuthi imali leyo eyayidingeka wayezayithola kuphi nini ngoba nje lelanga lalo okwakuthiwa lingatshoni laselivele selitshonile. Ithemba lakhe laselikuMthimkhulu, yena wayeseleminyakathize engakaze afike lapho kodwa indlela wayelokhu eyazi mhlophe esazi futhi lesitolo sakoMthimkhulu. Wayeyozikhala kumngane wakhe owayeselesikhathi eside agcina ukumbona, lapho uvalo lumtshaya lumeqe nxa esecabanga ngalokho.
UNduku lo ngumuntu ohlutshwa yizikwelede. Kuyacaca ukuthi litshapha elikhulu nxa ekuphatheni izimali. Ngumuntu owayelethuba elihle lokuthola imali ngokuthola imisebenzi ethile kahulumende lapha kusobala njalo ukuthi kazange asebenzise ukuhlakanipha wavele nje wawabala ingakachamiseli. Wakweleda imali zabantu inqwaba yezimali ethembisa ukuzibisela emva kokubhadalwa kwakhe kulimisebenzi ayeyenza. Kubo bonke abantu ayebakoloda kakho owayewuvalile kodwa-ke eyayisimphatha kabi ngekaMatshobana. Yena-ke wayevele wathembisa ukutsahaza ubuchopho bakhe phansi kanti wayengumuntu owayengathandabuzi kulokho ayekutsho.
Wabuye wanyathela amafutha ngamandla lapho eselibona iguma likaMthimkhulu. Uvalo lwathi ukwehla kancane lapho esebona iloli kaMthimkhulu imile nje egcekeni kwafika ukududuzeka ukuthi umnikazi walo wayengaphakathi nguye phela umuntu owayengahlenga impilo yakhe ngalesosikhathi.
Wangena egumeni lakoMthimkhulu wehla kweyakhe imota eyayibiza imali ephezulu waqonda evulandini lesitolo lapho okwakuphithizela khona abantu bezidlela amabele bengagqize qhakala. Weza kancane kancane uNduku eqonde esitolo lapha. Engalindele nje wahlangabezwa yinsizwa eyayinethezela okwamagama kucaca nje ukuthi yayizigalulela phakathi kotshwala.
