uMthunywa
Ophezulu Stinta
Sikhangela indatshana elesihloko esithi Uhlanya, ngokunanzelela isihloko lesi kutsho ukuthi kukhona umuntu ogula umkhuhlane wengqondo, olezenzo ezingaqondakaliyo mhlawumbe ezingathandwa ngabanye abantu baze bambone efana xathu lohlanya. Kuyenzeka njalo ukuthi umuntu lo yena angazinanzeleli ukuthi ukuleso simo esihlukumeza abanye abantu, ezibona nje engasoleki ngitsho lakancane.
Kundatshana le sihlangana lomlingiswa onguNduduzo okusobala ukuthi ukhona umuntu lo amthandayo onguye owenza inhliziyo yakhe idlaladlale, sekungathi ulahlekelwa ngumqondo ngenxa yothando alalo kuntombazana engunesi esibhedlela saseMaphumulo. Unesi lo nguNandi intombi ebunjwe yabumbeka, inhle kayifaniselwa, itshatshazi elimqotho.Lalingatshoni elikamdali engazange nje afonele esibhedlela uNduduzo, wayefisa ukuhlala elizwa ilizwi likaNandi ayizwe-ke inhliziyo yakhe ithobeka lapho ethe wakhuluma laye.
Esibhedlela lapha wayesezesaziwa ngenxa yokutshaya ucingo imihla lamalanga. Ngelinye ilanga ke uyamtshayela njalo ucingo uNandi amazise ukuthi yena uzibona engabuzwa nje ukuthi umqondo wakhe awusathathi kuhle.
UNandi ukutshaya indiva lokhu azihlekele nje lalapho ezama uNduduzo ukuthi ambonise ukuthi yena umthanda okwamagama aze amazise lokuthi yena angahlanya lokuhlanya lapho uNandi engasamukeli isicelo sakhe.
UNduduzo ubuya aziduduze njalo ngokuthi uNandi usivumile isicelo sakhe sokuthi babonane mhlawumbe lokho njalo ngokunye okungamnika ithuba lokumlalela isicelo sakhe aze aguqule inhliziyo yakhe njalo kuze kuthi lalapho ithuba lakhe lokuphumula liphela abe elakho okuncane aphume lakho kulo umzamo ongaka.
Wathi nje uNduduzo esuka ecingweni lukaNandi lwavela nje lwangena olunye lolo-ke lwaluvelela kunkosikazi kamnewabo uMazungu. UMazungu wayefona ngelizwi eliphansi ekhala ngokuthi kukhona ayekusola ngomyeni wakhe, indlela ayeziphatha ngayo yayingajayelekanga njalo yayisolisa.
Lapho uNduduzo ezama ukuzwisisisa ukuthi ngabe kwakutheni wasuka nje wabihla uMazungu kwangabikho sona isikhathi sokubuzisisa ngokwakusenzakala, kodwa ke wayebika indaba ezibuhlungu ukuthi umyeni wakhe wayengathi uhanjelwa zingqondo. Yamethusa kakhulu leyondaba uNduduzo wazibona kufanele ukuthi asize lelikhosikazi ngokuphazima kwelihlo.UMazungu laye wayesevele ephakathi kohlupho lokuthi kwakumele abesendaweni yako Dukuza ngokuphazima kwelihlo ngakho wayeselohlupho lokuthi umyeni wakhe wayezamtshiya lobani.
