uMthunywa
Ophezulu Stinta – Sisaqhubeka lendatshana elesihloko esibuzayo ukuthi nxa usithi uKholiwe, ukholiwe ngeqiniso na ngesinqumo lesi esithe yasithatha izasilondoloza na, kuze kufike ekucineni kwakho konke. Khona kuqakathekile ukuthi umuntu empilweni enze izinqumo ezithile azilandele angabi ngumuntu ophila nje okwenyamazana.
UJohn wahamba ebuza indlela yonke ukuthi uKholiwe wayengathinteki ngitsho langosizi ngomuntu ozimisele njengaye. Wacabanga waze waphuma lecebo. Wabona kungcono ukuthi ngemva kwamaviki amathathu ambhalele incwadi emazisa ukuthi laye wayesekhethe indlela yokukholwa. Wabona nje ukuthi wayengasoze nje ayiphathe eyothando ngoba nje yayingasuke iwuchithe umuthi inkonyane. Wayezathi ngelinye lamalanga laye avakatshele ngasenkonzweni ukuze ayemethula njengomzalwane, aze athenge lebhayibhili azathutsha eligodlile. Wabuye wabona kungcono njalo kumsebenzele ukudlala umculo wesonto lapha emoteni yakhe. Konke lokhu kwakuzamveza engu John oguqukileyo.
Ngapha ngakuKholiwe kwakungekho ngitsho okwakumhlukumeza umoya wakhe wazingenela endlini walungiselela intshumayelo yelanga elilandelayo. Wayeziphethe intambo zabatsha lapho ayetshumayela khona aze akhale. Ibandla lalo lalingamlibali umntwana olungileyo.
Kwathi nje ngelinye ilanga wadibana lomngane wakhe uJongosi. Yena-ke wambuzisisa uba babeyiphethe kanjani indaba yabo loJohn ngoba wayemcine egomela ukuthi wayezamthola kuphela. UKholiwe wamchazela njengoba wayechazele uJohn. UJongosi lo wayithatha ngelipholileyo impendulo kaKholiwe. Wambuzisisa egcizelela elokuthi kumele azibambe ziqine ngoba indlela yokukholwa yayingasomdlalo.Wamqonqosela ngelimqotho ukuthi angavumeli iziphepho zomhlaba zimenze inhlekisa.
Ngelanga langolwesibili uJongosi weza lephetshana lezindaba elaliqukethe udaba lwengozi eyayenzakale emgwaqweni weMandeni.Kwakubikwa ukuthi ingozi le yayenzakale phakathi kweloli lemota encane. Umtshayeli wemota encane wayehle wabhubha. Isithombe somuyi lo laso sasilapho. Wathi nje esithi nhlo ngelihlo uKholiwe lesosithombe kanye legama laso wadilikela phansi. Igama kwakunguJohn Hlatshwayo. UKholiwe kuyacaca nje ukuthi indaba le yamphatha kabi kodwa umbuzo ngothi ubuhlungu obungaka abuzwayo babuxhumene lokumthanda na uJohn, njani yena wayemxolisile ngokuthi kasekho kuleyondlela?
