uMthunywa
Ngeviki edlulileyo sixoxe kabanzi ngamandla enkolo sikhangela inkolo esihlangana lazo egwalweni lapha esinanzelele ihamba phambili okwalesi sigaba bekuyinkolo yesiKristu. Kulapho ebesinanzelela khona amandla enduduzo abantu abawathola ekukhonzeni iNkosi.
Imibuzo ilokhu isagijima emakhanda lapha ebantwini ukuthi ngempela yini le engaka ekhanya ikhathaza abantu emoyeni. Lwaphuma udletshana oluthi abantwana babansundu basebeqale inyosi emlinidini. Udaba oluvutha okwamalangabi omlilo wegusu.
Babewufuna ngamehlo abomvu umhlabathi wabokhokho babo okusobala nje lokuthi babethi kawuhluthunwe esandleni sabahlamuki, esandleni sabamhlophe pho yimpi eyayizathiwani le engaka eyayihlokozwa ngabantwana.
Umuntu omdala uMalandu simbona edungekile emoyeni lalapho ehalaliselwa ngendodana yakhe nje kutsho udaba ayebhekane lalo lwalulukhulu okwamagama, nanso indodana yakhe isiwadonse ngomsebe wagxila emncintiswaneni wokuloba evele eloba egxile kusihloko esisegudwini udaba olusemlonyeni wabantu bonke.
Pho ngokuphumelela kukaDingilizwe ekulobeni kwakhe lapha kungabe kulenhloso ngemva kwawo wonke umcintiswano lo. Kungabe lowo owaphuma lenjongo yomncintiswano wayevele edinga abantu abathile ukuze basetshenziswe ukuphumelelisa injongo lezifiso zabakhethekileyo na.
Pho isiphetho sodaba lolu sizakuba yini imithelela yaso izakuba yini sinanzelela lokuthi udaba lolu luthinta isikolo, luthinte umphakathi lubuye njalo luthinte lebandla leNkosi isonto lapho abantu abahlangana ndawonye ukuyakhonza uMdali.
Imibuzo yonke le ibuya ukuze senelise ukuzwisisa indikimba ezithile eziqala ukudaleka kanye lokubumbeka ekuqaleni kogwalo lwethu ukuze sizwisiseke lula. Ngayo njalo imibuzo le kuzakwenza ukuthi isihloko sogwalo laso sixhumeke lula kuzehlakalo ezivelayo ukuze kucace ukuthi isihloko lesi silufanele yini ugwalo njalo vele sona sitshoni ngemva kokuhlanganisa ukuzwisisa okujulileyo.
Sisabambe umbuzo njalo ongathi uyadida, yini le engaka eyenza amadoda enkafulakufa azojama endlini yokukhonzela ajame ephelele phambi kwebandla leNkosi, isibindi esingaka ngesani, kuvele kuhlosweni uMalandu aqhuqhe aze aphose awise lebhayibhili. Asijuleni ngemibuzo le egwalweni lwethu siyiqalela endlini yesonto ngeviki elizayo.
