uMthunywa
Umdlalo: Indlalifa Ngubani
Olwalotshwa ngu N.S Sigogo
Siqhubeka ngezifundo zethu esizithola egwalweni lwethu ngokufunda umdlalo lo. Yisifundo esimangalisayo njengabasakhulayo esithi sona, indoda yondliwa njalo igcinwe yizithukuthuku zayo.
Kambe aluba indaba yelifa ibingekho empilweni kaMphunzo, ezisebenzela njengawo wonke amadoda inotho yakhe eyakhele phezu kwezithukuthuku zakhe. Okumqoka lapha yikuthi lapho umuntu ezidlela amandla ezithukuthuku zakhe kahlali esevalweni njalo kadleli evalweni.
UMphunzo wayesengulowo ohlala nje amaphaphu akhe edlala lovalo, njalo elesazela sokuthi pho abafowabo babemcabangelani nxa kuzakusa bazavuka belaliphi iqhinga. Into yonke ongayisebenzelanga ngawakho amandla ayikholiseki, kuthi nje lokuyisebenzisa kwayo iyamotshakala nje.
Ukwanda kwayo kakucaci. Lokhu sikubona uMphunzo esethethe inkomo wayathenga ngazo inqola, isibaya senkomo seyethenga inqola.
Kusobala nje ukuthi akulakucabanga thize ngokuchithwa kwempahla lokhu ke kudala inhliziyo enganakiyo.
Isifundo sethu esigcizelela ukuzisebenzela kanye lokudla izithukuthuku zakho siyabathinta oPhehlani kanye loLuphondo. Bona bayilabo abakuhlangothi olungazange luthole lutho ngokwelifa.
Bakhulelwe yinzondo kumfowabo ngoba inhliziyo zabo bezilokhu zikhangelele ilifa. Ilifa leli kwakungamandla kayise, bona akulalutho abalusebenza ngawabo amandla baluginqela njalo ngezabo izithukuthuku okwabo ke bekungumhawu wenhliziyo.
Kambe aluba labo bebekhangele okuqondane labo okungokwamandla kanye lezithukuthuku zabo babezasithatha ngaphi isikhathi sokuzondana lomfowabo ngelifa likayise.
Siyabona ubuhlungu kanye lenzondo edalwa zinhliziyo ezifuna ukudla amandla ezingawasebenzelanga, kumbe lapho okungela ngitsho okuthiwa yizithukuthuku zabo.
Babesesebatsha belawo amandla okuthi bazisebenzele babe lamandla phezu kwezithukuthuku zabo, lokho kwakuzadala uthando phakathi kwabo behlanganiswa ngelithi bakhulise ngaphansi kophahla lunye.
