uMthunywa
Umdlalo: Indlalifa Ngubani , Olwalotshwa ngu N.S Sigogo
Siqhubeka ngezifundo zethu esizithola egwalweni lwethu, lolu olungumaphica.Sinanzelela kakhulu isifundo kumbe isixwayiso esithi abantwana bonke kabaphathwe ngokulinganayo. Nxa silandela udaba lokwabiwa kwelifa.
Sibona udaba lonke nje lugxile ebantwaneni abangabafana kuyibo okumele bathole ilifa phakathi kweguma. Izolo umntwana oyintombazana indawo yakhe ibisazakala isemkulwini, bekuthiwa okwakhe yikuthola ijaha lomendo andise isizwe sekuphelile, amandla akhe abephelela khonapho kuphela.
Abazali bakaPhehlani kanye lo Luphondo bananzelela ukuthi umntanabo wayesezithwele okwabo kwaba yikwendisa umntanabo ukuze kufihlwe ihlazo lokuzithwala esegumeni. Yebo langalokho futhi sinanzelela ukuthi yisifundo esikhulu ukuthi umntwana wonke oyinkazana kazigcine angazithwali esegumeni ngoba kuletha ihlazo elikhulu phezu kwakhe kanye labazali bakhe.
Besesibuya sinanzelela njalo ukuthi yikho lapho okudaleka khona ukweyiseka komuntu wesifazana kubanzima lokuthi axazulule udaba kanye lengxaki zomuzi wakhe, lalapho iqiniso elazi, sinanzelela kusiba nzima ngodaba lokuthi uMphunzo kambe yindlalifa yeqiniso na egumeni lapha. Nxa lapho abantwana abangamantombazana kanye labangabafana bephathwa ngokulinganayo abangamantombazana abande ukuba yibo abancindezelwayo bazizwa labo belamandla okuxazulula indaba zonke abahlangana lazo, benelise njalo ukuzimela empilweni.
Okunye esikunanzelelayo yikuthi izolo imfundo ibisilela kakhulu, inhlakanipho bekuyileyo egxile kweyemvelo kuphela ebidinga ukugcwaliselwa ngolwazi oluthile.
Udaba lokwabiwa kwelifa emdenini wakoNdlovu lwaselusilela nje yingalo yemfundo eyayizakwazi ukulandelela izinto kungelakukhethwa kwenhlangothi kodwa kuhlelwe izinto ngemfanelo.
Ngakho ke abazali bakulezi nsuku sebefinyelela elwazini olutshiyeneyo njalo sebelokufinyelela ingatsha zomthetho eziwayisa zibuye zihlele kuhle ngokwabiwa kwelifa, kuyisikhuthazo esikhulu kuye wonke umzali ukuthi lapho efisa ukukhangela ngokuhlelwa kwelifa lomuzi wakhe phakathi kwabantwana bakhe adinge lezo zeluleko ukuze kube lokuthula egumeni.
