uMthunywa
Ugwalo: Indlalifa ngubani, Olwalotshwa ngu N S Sigogo
Ophezulu Stinta
Sisungula ugwalo lwethu olutsha, umdlalo ohlabusa okwamagama njalo uqukethe izifundo ezimangalisayo ngesiko lokwabiwa kwelifa sikhangela impilo yendulo.
Sibala inkundla yokuqala, isigaba sokuqala, lapho esihlangana labalingiswa ababili uLuphondo kanye loPhehlani bezihambela endleleni sekuvele nje sekuhlwile bazivelela etshwaleni besuthi amabele baxoxa ngodaba olumqoka okusobala ukuthi lusegudwini.
Ababili laba ngumuntu lomfowabo, uLuphondo enguye njalo omdala. ULuphondo nguye ovusa udaba oluyinsinda baphenduli okusobala kodwa nje ukuthi lwaseluthule sebelibele ngalo dukuduku abantu sebeluvusa seluze lufika lasendlebeni zalaba ababili.
UGWALO
Indaba le ilukhuni yikho nje beyibiza ngelithi ilithumba eselibhoboka, lelo thumba lamila mhlazana kungcwatshwa uyise walaba ababili.
Indaba emqoka lapha ngethi uMphuzo, umfowabo wayehamba efunga egomela ukuthi wayengasoze ngitsho loba sekutheni abaqathele inkomo zelifa, nango esethembisa lokubemuka lezo ababelazo.
Kusobala-ke ukuthi kukhona ukungezwani okuthile phakathi kwalaba bantu, okungumbuzo omkhulu ukuthi kambe kuyini okwakubangwa uMphuzo aze afise lokubathathela leze sengelo.
