uMthunywa
Ugwalo: Indlalifa ngubani
Olwalotshwa ngu N. S Sigogo
Ophezulu Stinta
Siqhubeka ngogwalo lwethu lombuzo ophicayo njalo odida ingqondo singena inkundla yokuqala, isigaba sesibili.
Lapha sekukwabo kaMphunzo kuhlwile nje bebezinathela ngobunengi loba nje abanye sebechithekile kwasala uMphunzo, uMachibini, kanye loDumaza lesalukazi esinguLomkhono.
UDumaza uzwakala ngengxoxo engathi yisixwayiso kuMphunzo, lapho emxwayisa ngelithi wayemtshelile nje ukuthi angaze abamba inhlwa ngekhanda kwakumele izinto zakhe azenze nje ngokunanzelela okukhulu ukuze enelise ukudla akholise ilifa likayise.
UMphunzo ke laye ubuza ngelendelelo okomuntu ongaziboniyo nje lokuthi kungabe kukhona akuphambanisileyo, njalo amazwi akhe awamvezi njengomuntu mhlawumbe olenhlonipho.
UDumaza ke uyibeke nje ibesobala eyokuthi abasiki bebunda bathi usethenge inqola ngenkomo eziyisikhombisa.
Loludaba kaluphiki ngitsho kodwa ke ngegunya elikhulu uphendula ngelithi yena kathenganga ngenkomo zomuntu kodwa usebenzise ezakhe.
Umbuzo omkhulu ungowokuthi lezo nkomo zingezakhe ezithethe ngaphi.
Nangu lo Dumaza embuza ngelithi inkomo lezo wayehloze ngaphi?
