uMthunywa
Ophezulu Stinta, Ugwalo: Wangithembisa lami Olwalotshwa ngu: I N Mpofu
Ngeviki edlulileyo sitshiye uMlahlwa ehlelwe yisehlakalo ayelokhu wasicina esakhula ehlukuluzwa ngunina owayemgcina, owambophela esihlahleni ubusuku bonke waze waphosa wabulawa ngumqando.
UNyembezi wayembambele umsongo ke laye, wayengazimisele nje ukuthi inyamazana ayeyizingele insuku zonke ezingaka iphinde imphunyuke.
Iganyana liganyana, alihlubuki ubuganyana balo.
UMlahlwa wasizwa isifungo sikaNyembezi sangena sathophela ngaphakathi, wayifunda ivaliwe ukuthi uNyembezi wayengajiki kulesi sinqumo ayesesithethe.
Wathi nje kanye indoda ifa izamile.
Wathi lothu uMlahlwa ebotshiwe enjalo, wathi kangikudle Nyembezi ngekhanda, wamgqubula loNyembezi laye wasala ethithibele, lazama iganyana ukuzilwela lisongiwe kanti ngalelo langa kalibuzanga elangeni.
Kutheleka izulu lesikhukhula, elaliduma okutshaqisa umzimba okwenza loNyembezi laye waze wayacatsha ebhalwini, loba nje kwakufana lokuthi wayengacatshanga.
Konke lokhu kwenzakala nje sengathi umkhathi wawukhalimela ukuchitheka kwegazi, ukuphuma komphefumulo.
UNyembezi wayesenelisile lokho okwakufiswa yinhliziyo yakhe, wayesephindisele ngokubulawelwa uSolakele wakhe. Izulu lazigezisa inyawo zakhe, lalapho eziduduza ngelithi imilomo yabafileyo ingciniwe.
Kwaba yikucitsha kweganyana elinguMlahlwa emhlabeni, ngaleyo nkemba acitsha ngayo umphefumulo kaSolakele.
