uMthunywa
Ophezulu Stinta
Wangithembisa lami
Siqhubeka ngodaba lwethu lwesigilamkhuba esinguMlahlwa, ngemva kwezenzo zakhe zonke ezitshaqisa umzimba simbona esezimisele ukutshaya utshani esiya eGoli. Yisidalwa nje esingela nembeza esingelayo njalo inhliziyo yokuzisola, wavele nje yena waphila okweganyana.
Lelo langa-ke izulu laselithwele limnyama tshu kusobala nje ukuthi laselizakuna, wona nje umkhathi lo wawubika okuthile kodwa kubani isigilamkhuba esinguMlahlwa sasivele nje sizicabangela ukuya ekhaya ukuze aqhubekele phambili elungiselela uhambo lwakhe lokuya eGoli ayecatshela amacala akhe.
Edlula phakathi kwezintaba zaseMhlolweni kwakuvele nje kungathi thiki lapha kuye isazela nje sodwa ukuthi kulapho achitha khona umphefumulo kaSolakele. Wayembona-ke umuntu owayethutsha endleleni lapha kodwa nje njengesilo sendlela kazange khona nje ethuke loba sekutheni, wazitshela ukuthi ngomunye laye owayebalekela izulu wayezazizwela ngokuwa.
Leyo ndoda kwakunguNyembezi laye owayesejabule esefile ebona inyamazana yakhe iziletha emjibileni. Wacandama esixukwini uNyembezi wabamba umphefumulo wakhe, ukuze ungamphoxi, wayezawukhulula lapho isitha esesibambe ngesandla sakhe.
UNyembezi wayecandeme nje ehlomile, ethwele inkalakatha yembokodo ngapha ethe zwi lesagila. Wathi nje uMlahlwa edlula maqondana laye wayikhulula umhlolo yahlala yathulwa zwi enhlafunweni kaMlahlwa yahle nje yamlahla phansi.
