uMthunywa
Wangithembisa lami, I. N Mpofu
Ngeviki edluleyo sitshiye uSolakele esevela emavinkilini, engazi ukuthi wayehamba nje kuleganyana elalimlalele endleleni.
Inhliziyo yakhe nje yayigcwele ukubonga kuphela esaphakathi kwaleyo njabulo wezwa eseqelwa liganyana elalicandeme, engalindelanga ukuthi kwakungathutsha umuntu onjengoMlahlwa.
Iganyana leli lamkhomba ngebhenede emehlweni limazisa nje ukuthi angahlaba umkhosi wayezadliwa libhenede.
Ngokuphazima kwelihlo iganyana lamkhupha endleleni lamkhomba eyalo, lalingazimiselanga ukuzwa lelizwi eliphuma emlonyeni kaSolakele, okwakuqakathekile ngaleso sikhathi yikuthi uSolakele alalele lokho ayekutshelwa nguMlahlwa.
UMlahlwa-ke lapha wayesezimisele ukuthi uSolakele wayesehamba laye eGoli, wayengasajiki kuleso sinqumo ayesenzile ekhanda lakhe, njengoba wayengu ntando kayiphikiswa.
USolakele kwasekumele akhethe nje lokho okufunwa nguMlahlwa, ukuhamba laye kumbe ukusala edliwa ngamanqe emqolweni wezintaba lapha.
UMlahlwa ukhala ngokuthi laye wamthembisa izulu lomhlaba kanti pho lo osekhanya esengcono kulaye ngonjani njengoba nje laye eyindoda.
USolakele laye wayengasazi ukuthi ucabangani kambe ebhekane leganyana, limvulele awesilo, wayesefisa nje ukuthi ngabe wayengaphuma ngentutshana asinde ezandleni zikaMlahlwa.
Kwathi nje lapho lisaphongela, ethi uphendukela kuSolakele kwabe uqambe etshilo, waphakama okwesavunguzane uSolakele, wayebaleka ngesiqubu esasengezwa yikwesaba kudibene lokudinga ukusinda.
