uMthunywa
Ukuhluzwa kwengwalo
Ugwalo Emfuleni Wezinyembezi: olwalotshwa nguEzekiel Hleza
Ophezulu Stinta
Silokhu siphezu kwesahluko sethu sokuqala lapho esitshiye khona abazalwane beNkosi bexotshwe endlini yeNkosi kwathiwa kababuyele emakhaya ngoba kwakungela qiniso ukuthi ngabantu ababedibene kulindawo ngenhloso yokukhonza kanye lokudumisa iNkosi.
Kambe ngabe kwakuliqiniso lokhu ukuthi abantu babetshiye imizi yabo ngenhloso efihlakeleleyo na kodwa nje lasendlini yokukhonzela lapha sibezwa bezikhonzela iNkosi. Kutsho sikhona isizatho esiyiso esimqoka kukanti njalo esasivutha phakathi kwababusayo esasizenza izakhamizi lezi zigadwe ngelihlo lokhozi.
Abebutho lombusazwe basuka laye-ke uMalandu baqonde laye emzini wakhe lapho abathola khona inina lakhe uMaMoyo. Okwakufunwa ngabebutho lapha babefuna uDilingilizwe uqobo lwakhe. Wabhuqukeza uMaMoyo ngelithi kambe njengoba laye wayevele edinga umntanakhe babekuthatha ngaphi-ke ukuthi bazomtheza ngemibuzo sengathi wayemfihlile.
Umfanekiso uthethwe ku ISO Republic
Ubuhlungu bomhelo wonke bavuka bema ngezinyawo lapho kuMaMoyo okwenza nje labebutho laba bananzelela ukuthi kulelizinga wayelakho ukwenza loba kuyini njengoba nje wayesethembise lokuvoxana lepholisa elalihamba labebutho. Ngokuphazima kwelihlo umpholisa uNdlela wathi kuMalandu kwakuzaba kuhle nje ukuthi angene ejibhini yamapholisa baqonde eManama lapho okwakumele ayezibonela ngamehlo akhe isiga esasenziwe ngumntanakhe.
UMalandu kwakungathi ngalelo langa uyifunde ivaliwe engazange awuvule okutheni owakhe umlomo umuntu weNkosi waqonda emoteni wangena ngenhlonipho wazigoqa okwenyoka emlindini.
Kwasuka kwathi nje kungathi kuthi dlwe kuMaMoyo lapha esenanzelela nje ukuthi kusengenzeka lokuthi wayedlala ngegeja kuziliwe. Wasolobela endlini yakhe walinda elizayo. Umango weManama wancipha kuMalandu lapha waqala nje ukuzwa senethwa ngemibuzo evelela kuNdlela ipholisa ayesuke lalo besuka nje endlini yokukhonzela baze bafika lalo emzini wakhe njalo.
Wabuzwa-ke ngenani labantwana bakhe kanye lamabizo abo. Imibuzo yakhona yayivele yona idinga lokho eyayikuhlosile, kambe wayengabuzwa nje langokuthi vele amabizo abantwana bakhe wabetha ehloseni wavele nje wabetha phezu kwelikaDingilizwe ukuthi lilizwe elitheni lelo ayesiyalidinga kutsho vele wayephezu kwenhloso, nhloso bani pho.
