uMthunywa
Ugwalo: Emfuleni Wezinyembezi
olwalotshwa ngu Ezekiel S K Hleza
Ophezulu Stinta
Ngeviki edlulileyo besixoxa ngodaba lokuphumelela komfana kaMalandu obekuyinsindabaphenduli, yikuthi uyise womntwana udaba lolu yena vele belungamhlabi umhxwele ngitsho lakancane kodwa kungathi nje kukhona okungamhambi kuhle.
Emva kwesikhathi ke uMalandu wethula udaba oluyilo olumhlukumeza okwamagama udaba oluthi uDingilizwe indodana yakhe yayingene umncintiswano wokuloba kuthi kunjalo uDingilizwe laye alobe ngesihloko kanye esihlaba umxhwele njalo kuyilona daba olusegudwini udaba oluthi abantwana bakhalela umhlaba waboyise.
Pho kwakungaba ngaphi ukujabula kuka Malandu phakathi kwesihloko esinje kanye lomumo owawuphithizela, wayengalazi ikusasa lomntanakhe phakathi kwezivungu vungu zokubangwa komhlabathi, lelizwe licaca ligedezela.
Udaba lwabo alusaqhubekelanga phambili ngenxa yabantu abasebegcwele enkonzweni, basuke nje bayikhulumele emasekweni. Phakathi komumo okhona kufika ukuhlabelela kwengoma ehlaba ngaphakathi esondeza umuntu kuSomandla sengathi yimpendulo yaleso sikhathi abantu bedungekile ukuthi indumiso yeNkosi iyafinyelela enhliziyweni zabantu abadubekileyo, indumiso iyimpendulo ngesikhathi indlela icaca imnyama.
Emva kwengoma kufundwa encwadini kaEzekiel lapho uMalandu agcizelela khona ngomumo ababhekane lawo njengesizwe wagcizelela njalo ngelithi isizwe sasesigqagqelwe yibunzima ngakho kwakumele bakhangele kuSomandla.
Kukulesi sigaba lapha esinanzelela khona amandla enkolo sikhangele inkolo yesiKhristu. Lokhu sikutsho ngoba lukhulu udaba ababhekane lalo sibone ukuthi ithemba labantu ligxile enkolweni yesiKhristu.
Kwathi nje inkonzo ingakatshayisi kwenzeka isehlakalo esingajayelekanga, emnyango wendlini yokukhonzela kwasekumi amadoda amabili amhlophe ayehlome ephelele lokwenza izikhali zabo zikhangele ebantwini.
UMalandu nguye owaqala ukubona isehlakalo lesi wethuka waze waphosa wawisa ibhayibhili amaphaphu ayesebhulana ukuthi pho ngabe kwasekutheni sebehlaselwa kuhlonyiwe kanje.
