uMthunywa
Ugwalo: Emfuleni Wezinyembezi olwalotshwa ngu Ezekiel S K Hleza
Ophezulu Stinta
Kuliviki sikhangela ugwalo lwethu olutsha olulandisa ngezigigaba zempi yenkululeko ezenzekala esigabeni seMapate endaweni yeGwanda. Indaba yempi yenkululeko yindaba ehlaba emphefumulweni igwaze inhliziyo ngomkhonto yophe.
Okumele sikunanzelele-ke yikuthi asiso sodwa isigaba seMatape esahlaselwa yimpi le yenkululeko kodwa-ke ngumlobi okhethe ukuthi asendlalele yena ngokwenzakala esigabeni seMatape, ezinye izigaba mhlawumbe laye watshiyela abanye njalo abalobi ukuthi labo balandisele umphakathi ngabakubonayo kanye langalokhu okwehlayo.
Ugxile kuyo njengempi yeMatape, hatshi impi nje kuphela. Kusobala-ke ukuthi kunengi okwahamba kwathinta kwengeza njalo kwamemethekisa impi kulesi sigaba seMatape okwamenza laye waze wahlala phansi waloba ugwalo lolu.
Isihloko sogwalo sithi Emfuleni wezinyembezi, siyacaca ukuthi ngempela kwakungelula phakathi kwalesi isigaba, kwakufiwa, kuchitheka igazi kuyizililo njalo sekuze kungumfula ogeleza izinyembezi.
Lapha sikhangela isihloko lesi sifikelwa yimizwa yokwesaba kanye lomzimba ohlasimukayo kuze kufike kanye lemifanekiso ebophanisa inwele ukuthi abantu babebulawa njani kuze kube yizililo ezingaka.
Siqala isahluko sokuqala, sihlangana loyise kaDingilizwe ovula ugwalo lolu ekhwaza indodana yakhe.
Uyikhwaza ngelizwi elikhalimayo okucaca ukuthi lokho okwakusenziwa yindodana yakhe wayengahambelani lakho ngitsho. UDingilizwe lo simbona nje esengumuntu osekhethe isinqumo sokuhamba lelizwe ukuze kubuse ithole lomuntu omnyama okuyikuthi wayesezimisele ukuyalwela inkululeko yelizwe lakhe.
Wala lalapho uyise ezama ukumkhuza ngelithi angaze wathatheka ngomoya welizwe yena uhlohla izigodo endlebeni loyise aze afikelwe ngumhelo kanye lobuhlungu bokuba ngumzali.
Ozeleyo ulomlandu, uSekaDingilizwe simuzwa njalo esetshaya umkhuleko wokuvikeleka ecelela indodana yakhe umusa eNkosini ukuthi angaze waba ngosithela endongeni zomhlaba.
Ngobunzima bomumo uSekaDingilizwe awubonayo kuvele sobala ukuthi yena eyakhe inkolo igxile ngaphi. Ubetha umkhuleko ewubhekise kuSomamdla, lapha-ke sesihlangana lendikimba yenkolo, ukholo lomuntu luvela ngesikhathi sobunzima obungaphezu kwamandla omuntu.
