uMthunywa
Ugwalo: Indlalifa Ngubani olwalotshwa ngu N S Sigogo
Ophezulu Stinta
Ngaleli iviki siphutshisa indikimba zethu ezimqoka esihlangana lazo egwalweni lwethu njalo kuyilezo ezakha isiqokoqela sendaba zibuye njalo zisakhele izifundo ezimqoka esizifundileyo egwalweni lwethu.
Indikimba yokusweleka kwemfundo. Ulwazi empilweni luyinsika yempilo kukanti njalo ukusweleka kwalo kubuya kuyibhidlize impilo.
Kulezi nsuku imithetho yakhiwa imihla lamalanga ukuze abantu bonke bazizwe bengabantu njalo belamalungelo abo apheleleyo ahlonitshwa ngumuntu wonke abanike labo inhlonipho abayidingayo empilweni.
Abantwana bakaNdlovu bonke babelelungelo ekutholeni kanye lokuba yingxenye yelifa likayise kungakhathalekile ukuthi omdala ngubani. Asikuboni kusenzakala ngendlela ehlelwa lulwazi kanye lengcitshi zokwabiwa kwelifa. Izilandela muva zakhona ke ziyinzondano kanye lokuchitheka kwegazi.
Isiqokoqela sendaba ke ngensuku zalamhlanje yikuthola ulwazi lonke ngezinto eziqakathekileyo empilweni ezithinta abantu insuku zonke zokuphila kwabo.
Enye njalo indikimba emqoka ngeyokuqakatheka komdeni. Umdeni ligazi, umdeni luthando kanye lokwakhana. Lapho kulezinto ezingahambi kuhle phakathi komdeni kungumlandu womuntu wonke oyingxenye yomdeni ukuthi asize aphathise ilunga lomdeni lapho lithe lehlelwa liyezi elimnyama.
Ubabakazi ugijima aqothule uthuli ehlanganisa abafana kanye labadala ngesikhathi lapho kulungiswa indaba zomdeni, kasimboni egoqa izandla ezigeza ngelithi abafana bakamnewabo kabamhloniphi kumbe kabahloniphi abadala emulini, udlala indima yakhe ngokuphelelisa umlandu wakhe emdenini.
Nxa besweleka abanjengaye umdeni uyachitheka kukanti lalabo abakade bezasila bacine bengasaphephanga. Loba nje kungasizo zonke ingxaki ezingaphendulwa ngesikhathi sokuxabana kanye lokungazwisisani. Kubuya njalo kuqakatheke ukwazana phakathi kwemuli ukuthi bangabantu banye kungakhathalekile ukuthi kulokuzwisisana kumbe kulengxabano.
