uMthunywa
Ophezulu Stinta
Ugwalo : Indlalifa ngubani
Silokhu siqhubeka ngomdlalo wethu ongumbuzo omkhulu Indlalifa ngubani. Umbuzo ophicayo.
Sinanzelela ukuqakatheka kwamasiko kusifundo esidluleyo. Esinye njalo isifundo esihlangana laso ngesithi amasiko achaza njalo aqakathekisa ubunguwe bakho.Ngokutshiyana kwamasiko langendlela abantu abawaqhuba ngawo achaza ukuthi vele bona bangobani. Emulini kaNdlovu lapho sekumele kuhlalwe phansi kukhuzwe abafana, sibona imuli ithumela uyisekazi wabantwana, uLomkhono.
Kulisiko lemuli ukuthumela uyisekazi wabantwana ngoba ngokwenza njalo kuyikuhlanganisa umdeni lokuwugcina ndawonye.
Isiko lokuthemba ubabakazi egumeni lilondoloza imfihlo zemuli. Aluba kwakucelwe umuntu kazana nje ukuthi ayedinga oPhehlane afike esizwa amagama ababewakhipha ngemilomo yabo langokugcwalelana kwenhliziyo zabo kambe wayengafika ebabaza umhlolo onganani, lanxa izakhamizi zesigaba sezikhangela umuzi wonke kambe zazizakuthi yimihlobo bani yabantu. Ukuhlonipha ubabakazi egumeni aphiwe ithuba lokudlala indima yakhe bekulisiko eliqakatheke kakhulu ebelisakha imuli.
Kuyisifundo esimqoka njalo kulezinsuku ukuthi imuli zivuselele ukuthenjwa kanye lokuthunywa kwabobabakazi ukuthi babe yibo abalamula kuzimpi zomdeni.
Okunye njalo esikufundayo emdlalweni lo yikuqakatheka kwendlalifa. Kwakungaba yimibuzo eminengi ukubona owesilisa elokhu ezala ikakhulu lowo oyabe ongelamntwana ongumfana ubonakala ngokuqhubeka edinga indlalifa kuze kuphose kugcwale iguma. Bekuyingxenye yesiko lesintu njalo indlalifa kwakukholelwa ukuthi ngobudala bayo yayilolwazi lokwabiwa kwelifa lomuzi ngokufaneleyo, ukuze abanye bonke phakathi kwemuli labo bathole okuthile.
Kuyisifundo esivela sobala-ke ukuthi akusibo bonke abantwana kumbe labo abakhethwa babezindlalifa abenelisa ukugcwalisisa okukhangelelwe ngabazali babo kumbe okukhangelelwe ngokuqhutshwa kokwabiwa kwelifa. Kuyacaca njalo kubeyisifundo sokubana abazali loba benanzelela ukuqakatheka kwendlalifa ngokufanayo kube yibo abazabela ilifa ebantwaneni babo ukuze benqabele ukuxabana ezimulini.