uMthunywa
Umdlalo: Indlalifa ngubani olwalotshwa ngu N S Sigogo
Siqhubeka ngomdlalo wethu lapho esikhangela khona izifundo ezimqoka esihlangana lazo njengabafundi bogwalo.
Izifundo lezi zilimukisa ngitsho lasempilweni yalamuhla. Sikhangela umbuzo omkhulu othi kuyini ukuhlalisana kuhle kwabantu. Ukuhlalisana kuhle yikuthi lapho omakhelwane belohlupho benelise ukumemeza umakhelwane ukuze bahlangulwe kulokho okukhathazayo.
Kuba lobunzima lapho umuntu engahlalisani kuhle labanye njalo engakhulumisani kuhle labomakhelwane, sekulesidingo uyabe ezamemeza ngelithini. Sinanzelela ukuthi abafana bakaNdlovu kabazange baphathe kuhle omakhelwane ngesikhathi kulombuthano wombuyiso kayise egumeni lakwabo.
Abantu nxa bethekelele kabakhangelelanga ukuthi kuqale ukuvuka izimpi zomdeni phakathi. Lokhu nje kuyisenzo esimumethe inkulumo ethi izethekeli lezi kumbe omakhelwane laba kabahlonipheki, bayeyiswa ngabanikazi bomuzi. Yikho abantu beNkosi bavuthuluka babutha izidwaba zabo baqonda emizini yabo ngokuthula kwaba ngelithi abomdeni sebezasala-ke beziqedisela amabele abo bodwa. Nxa sekunje sekudala ukungahlalisani kwezakhamizi okuyinto engancomekiyo.
Kukanti okuqakathekileyo yikumelela izethekeli ziqede umlandu eziwulande egumeni, abomuzi sebengasala-ke belungisisa indaba zabo bebodwa. Ngokufanayo labomuzi labo bayazilulaza phambi kwabomakhelwane labo bangabe besabakhangela ngelihlo elibanika isisindo kanye lobuntu nje empilweni.
Esinye isifundo esihlangana laso egwaleni lapha yilesi esokulondoloza amasiko. Isiko liqoqa umdeni libuye njalo liwakhe ugcinakale undawonye. Umnikazimuzi uyise waboLuphondo, Phehlani kanye loMphunzo lapho esedlule emhlabeni. Imuli kayizange imlibale nje ithule ngaye, isiqokoqela kube yikukhangela ilifa elaligcwele esibayeni.
Kwenziwa umbuyiso ngendlela yesiNtu beletha uyise egumeni loba sewadlula okwakuyindlela yokuthi bayamkhumbula njalo bayamthanda kungakhathalekile ukuthi wayengasekho, lokhu kuqinisa lokuthi izinqumo eziyabe zibotshwe ngumuyi zilandelwe ngendlela ayetshiye ezihlele ngayo, kwezinye izikhathi kuyikho okuletha ukuthula loba nje kwezinye izikhathi kudala ingxabano.
