uMthunywa
Umzila kawulandelwa
Olwalotshwa ngu B D Ndlovu
SIQHUBEKA lendaba yethu siqala isahluko sesikhombisa. UMzilakawulandelwa usilandisela ngolunye usuku lapho abavuka khona umkhathi umuhle okumangalisayo kusobala ukuthi ngayizolo laligxobe okuzwayo, izinanakazana zazijabulile okwamagama zitshabatshaba indawo yonke.
Imvelo le laye yaze yamkhumbuza esemfitshane lapho ayethanda khona ukuxokozela bexotshana lezinhlwa, okwakungumdlalo womntwana wonke osakhulayo, kodwa-ke ngaleyo mini kwakulusizi ukuthi kwakungekho ngitsho loyedwa umntwana owayebonakala phandle lapha, kwakungela ngitsho owayedlala lobuhle bemvelo lobu. Phakathi kwemizi lapha kwakuthule zwi sengathi kwakungela bantwana ngitsho. Lokhu nje kodwa kuyingcazelo yezinto ezinengi ngokuhlaliseka kwabantu. Basuka-ke bayabuthana emaqaqeni eGoshanka njengabantu ababangeke babuthane phakathi kwemizi kumbe egcekeni nje.
Indawo yonke kwakuliwa, iziqinti zonke zazingelakuthula ngitsho. Iqembu leli elaliseGoshanka lona lalilawulwa nguKillem Nyamazana njengoba omkhulu wabo uMthakathomnyama wayesele empini eyayenzakele kweleGomoza. Ukusebenzelana ndawonye lokhu kuyaveza ukubambana kwabo ngenhloso eyodwa qha eyokunqoba isitha, kakulakumelela omkhulu ongekhoyo kodwa kungena omunye umsebenzi uqhubeke njengokujayelekileyo.
Wakhuluma ngelizwi elilamandla kakhulu egcizelelela ukuthi babephakathi kwesikhathi esinzima kakhulu, kwasekumele bakhethe phakathi kokufa bazendlalele kumbe njalo banqobe balithathe ilizwe leZimbabwe.
Babelahlekelwe kakhulu empini yeGomoza, kwakuchitheke igazi labafo elinengi, kwakuyimpi eyayingaphumi lasemlonyeni wabo. UKillem wakhala ngabafowabo abanengi ababalisayo; oSathane, uMthakathomnyama, uMambeluhlaza, oManyathela, oFunokwakhe, bonke laba kwakungamaqhawe amakhulu ayelahleke kweleGomoza.
Umbuzo omkhulu wawungowokuthi kwenziweni pho ngamaqhawe la ayesele kweleGomoza, iqembu lonke lavungama ngelithi kakuphindiselwe, babengeke nje bathule sengathi kakulalutho olwenzakeleyo ngabafowabo. Kwakumele baphindisele okwamagama, kwakumele kuchitheke igazi elizwayo.
Bonke babesazi ukuthi abafo babo, amabutho amabhunu ayegcwele enyathelana eRest Camp, lapho abasebezakhele khona umuzi oyinkamba yabo. Umcabango lo wawubanika ithemba elizwayo ngoba kwasekusobala nje ukuthi kwasekumele bahlasele iRest Camp batshaye bachithe.
Abafo laba iRest Camp yabo yayile kweleJiba Jiba. Kwasekudingakala ulwazi oluthe xaxa ngendawo yeJibajiba le, kwakungeke kuvume nje ukuphonguthutsha umango lo bengawazi kuhle. UKillem wakhetha inhloli okwasekumele zihambe phambili ziyehlolisisa ngendao ziyehlolisisa ngomumo kuleyo ndawo, inhloso emqoka kuyiRest Camp.
