uMthunywa
Ophezulu Stinta
Ngaphansi kwesihlokwana esithi yaphinda emhlolweni, lapho esilokhu siloNyembezi ehlome ephelele elinde ukugadla ajuqe isilo esadla iluba lenhliziyo yakhe.
Umalumakhe lokhu eme laye engumsekeli womzukulu wakhe kumpindiselo abayihlosileyo.
Benza iqhinga lokwabelana inyamazana zabo, uNyembezi uqonqosela umalumakhe ukuthi abambe uSayini azitike ngaye, kodwa ke engakaze amjuqe, azame ukumphoqa ukuze akhulume iqiniso, konke akwaziyo ngokufa kuka Solakele.
Sibona ababili laba belala bedanile bengasajimbanga, uMlahlwa loNyembezi sebedliwe ngamahlathi.
Abadala bathi ithuba libuya kanye empilweni, uNyembezi lomalumakhe basebekulelo zinga lokulahlekelwa lithemba ngokunyamalala kwethuba.
Bazikhuza bodwa ngelithi babengeke balale bezingela ebunyameni hlezi badilikelwe ngamatshe baginywe zimamba.
Ngakunye uhlangothi njalo uMlahlwa lo Sayini labo abazange babuquthe balala bezitshovela amakhasi.
Lelo langa bavuna mpela ngokutsho kwabo bathola amadola alitshumi, bawadibanisa lalawo ababewathole izolo.
Imali yabo yayisinengi okokuthi ngenhliziyo ethambileyo inhliziyo yokupha, babengathola ingxenye ezithe xaxa bobabili, kodwa ke uMlahlwa wayengelayo leyo nhliziyo.
Wayibiza yonke nje njengenjayelo wacuphela uSayini okungamanganyana.
USayini laye nje ngoPhawundi wayizwa inhliziyo yakhe ihlifizeka, wayezathini engela mandla.