uMthunywa
Siqhubeka ngokucubungula izimilo zabalingiswa bogwalo lwethu, sinanzelela abakwenzayo egwalweni ngokutshiyana kwezenzo. Kesikhangele umlingiswa wethu uSimilo. Le yindoda kumbe ngowesilisa esihlangana laye elamaqhinga esiqala singawazwisisi kumbe ukuhlangana kwakhe loSethekele okokuqala kwakungazwisiseki.
Ngokuqhubeka kogwalo sinanzelela ukuthi wayengumzawakhe kaSethekele. USimilo lo wayengowesilisa esihlangana laye ezithobile. Kazivezi ngokusobala ukuthi vele injongo yakhe kumbe inhloso yakhe yayigxile ngaphi. Uyazithoba nje alungise inhlelo zakhe zokukhipha uMzila esibhedlela kungelamuntu owaziyo.
USimilo lo wayeyindoda eyayikhaliphe okwamagama, amaqhinga ayephuma lawo ekhanda ayesobala ukuthi wayengusomaqhingase yena ngokwakhe njalo wayeqeqetshekile kwezokuba ngumcuphi.
Lokhu sikunanzelela ngendlela uSethekele atshontsha ngayo uMzila esibhedlela. kwakusobala ukuthi kwakungasomaqhinga omuntu wesifazana eyedwa nje. UMzila esetshontshiwe esibhedlela lomzila wakhe lapho abahamba khona wawungalandeleki.
USimilo nguye njalo owakhokhela elaya njalo ngendlela okwakumele kuhanjwe ngayo. Indlela lezi wayezikhomba ngenkomba ndawo, engena ngokuthemba imitshina ayesehamba ngayo okwaleso isikhathi okwakugoqela inkomba kanye lemota ababehamba ngayo. Lokhu kugcizelela kakhulu isibindi ayelaso njalo lokuzethemba ayeyikho khona. Ukuqonda umlomo wesilwane ewukhangele.
