uMthunywa
lwalotshwa ngu B D Ndlovu
SIYAQHUBEKA ngodaba lwethu lapho esihamba khona lamaqhawe empi, ayeqhuba uhambo ngesibindi kungakhathalekile ukuthi endleleni lapha ingonyama zazivule amehlo kanye lamazinyo amade.
Lesi isenzo sasibaveza bengabalingiswa abalezibindi njalo abazimisele ukufeza okumqoka empilweni zabo. Siyananzelela ukuthi asibaboni besethuka kumbe bephaphalaza, kabethuki ngitsho.
Abakukhangeleleyo kuphela yikufeza udaba lwabo, okusivezela izinga labo lokuzimisela. Sesibone njalo behlangana lezehlakalo ezihlasimulisa umzimba okwakungenza sibili bajike kukho konke ababezimisele khona. Sibona nje sekumele bedlule kusigaba sokucina.
Zaphenquzwa zaphenquzwa ezinye imota kwathi eyabo-ke yasinda ngoSimilo owacaca esaziwa.
USimilo-ke wayibeka indaba yakhe emasotsheni la ayevimbe indlela, ngelithi babehamba ngemfa yabantwana ababetshiselwe endlini. Bonke-ke basola kakhulu ngezenzo zamatororo ababezibabaza ziyilezo ezihlasimulisa umzimba.
Masinyazana nje bavunyelwa badlula, laye uSimilo wezwakala ezitshayela umlozwi ethi ngcingci kandoyi ngelenjabulo enkulu sebedlulile emazinyweni esilwane.
Phakathi emoteni lapha uMzila wayeseqhuqha okwamagama ngemva kokubona umfana owayengelasithupha esenziwa into yamehlo phambi kwakhe.
Imota yangena umgwaqo yadla amahabula. Kwakusobala-ke ukuthi umtshayeli wayeyazi indlela yakhe nanso imota ibonakala isijika ingena indlela esekela umfula.
Bonke nje babehamba bebambe amathumbu nanko sebe sethuswa libhalabhala elaphosa lazithela phezu kwemota kwaba yinhlanhla nje ukuthi umtshayeli wahle wayiqobotsha.
Uhambo lwabuya lwaqhubeka njalo bahamba lomfula baze bafika esifudlaneni esichayekileyo, kulapho-ke abenelisa khona ukuthi bachaphe.
Wayincenga ncenga uSimilo yaze yavuma, indlela yakhona yayilameva. Bengakahambi okuyangaphi imota yezwakala sithe ntsi. Wayizama esayizama uSimilo wabuye wayikhangekhangela ukuthi abone ukuthi uhlupho lwalungaphi.
