uMthunywa
Silo Charles Dube
Ugwalo lwalotshwa nguJabulani Buthelezi
UJohn Mbabhadisi Ngubane uphindela eMpaphala
UJohn Mbabhadisi ufika eMpaphala zimphethe inhloni ngalokho akwenzaya. Ngithemba bafundi siyakhumbula ukuthi wala ukugcina abantwana bakaLinono, uHlanganisani lo Uzithelile. Wala lanxa uCele efikile emzini wakhe ezobacelela ukuthi abagcine. Waphuma njengenja uCele koNgubane kungathi kukhona akonileyo umuntu omdala.
Wayezibona ehlezi kuhle uNgubane lomkakhe uMaMthimkhulu bengafuni ukuthi bagcine abantwana babanye abantu lanxa beyizihlobo eziseduze. Isihlahla kasikhohlwa kodwa ihloka liyakhohlwa. Ufika kwaCele uNgubane athole umalumakhe uCele evele elethemba ukuba uyeza. UCele likholwa elikholwa elithembela kumthandazo eNkosini yalo.
Kumgceke ukuthi uCele impilo yakhe uyibeka eNkosini engcwele ngoba ngemva kokubingelelana uthi makhulu amandla kaSomandla yena ofanele ukubongwa nsukuzonke. Uyatsho uCele ukuthi ubekhathazekile ngaye uMbabhadisi ikakhulu ngalolo suku ekuseni. Lwakwakhe uMaKhumalo uthi umbeke kakhudlwana emthandazweni. UCele ubuza ingane kadadewabo ukuba kunjani kwaSathane, kwanhliziyo ngise.
Kuyamethusa uNgubane enze engathi kakwazi lapho kanti wayezwe kuhle lanxa wabuza umalumakhe ukuthi kungaphi lapho. Lanxa elenqaba lelo elokuthi uphuma kwaSathane ethi uphuma eMadadeni lapho agcina ehlala khona, umalumakhe uthi kalandaba lazo lezo ndawo aziqambayo yena into ayibuzayo yikuthi kunjani kwaSathane. Waqhubeka uCele esithi iminyaka yakhe yokubhunguka, etshiya umkakhe ephilisa okwembungulu yona ephila ngonyama makube imkhandile.
Uyavumelana lomalumakhe uJohn Ngubane ethi umalumakhe uyitshaye ekhaleni ngoba vele iqiniso kalivikeki. Wavuma ethi empeleni usevela esihogweni, yikho nje elapho. Wathi usekhathele uNgubane njalo wayengazi ukuthi angenzani ukuze abisele iminyaka yakhe emuva, beseqala kutsha. Wathi kakwazi layengakutsho kumalumakhe. UCele uveza ubukholwa bakhe obuqinileyo ethi ubekwazi ukuba uyeza umbabhadisi ngoba kungelanto abake bayicela abaze bayifumana.
UCele watshela uNgubane ukuthi bawucelile umusa ngale mpilo yakhe aseyiphahazile. Nanku wayese lapha phakathi kwamasango akoCele eMphaphala. Ngemva kwalokho uCele utshengisa uNgubane abazukulu bakhe angabaziyo. Izingane lezi zine. Ezimbili ngezika Melody indodakazi yakhe uNgubane kanti ezinye ngezikamzawakhe uHlanganisani. Watsha amathe uNgubane ukuzwa ukuthi ingane yakhe yayilezingane ezimbili njalo layo yayisiye phetsheya.
Ebuza ukuthi uMelody ulabantwana ababili ngempela, uCele uphendula ethi yena kamazi uMelody, yena wazi uVuk’uzithathe olabantwana ababili manje sebengabakaHlanganisani ngesiZulu sakibo. Funda uzwe ukuthi lubeka njani lolu gwalo.
