uMthunywa
Imibhalo engalotshwanga
SIQHUBEKA sinanzelela izibongo zamakhosi, siyafunda njalo kabanzi ukuthi amakhosi ayizolo bekungabantu abebephila phakathi kwezimfihlo ezinengi okwamagama, impilo yamakhosi ibingekho nje egcekeni kumbe emehlweni kazulu wonke jikelele, kunengi obekusenziwa ngasese.
Ngalokhu-ke isifundo esikhulu ngesithi abantu abaphethe abantu kuqakathekile ukuthi baphile impilo efanana laleyo eyamakhosi akudala, kumbe amakhosi ayizolo. Lokhu-ke babekwenzela nje lokudida amehlo esitha ukuthi singaze senelisa ukulandela umkhondo wabo okokuthi lapho sigadla sasivele sihle sitshaye sithanyele.
Ukuphila impilo ecatshileyo kakusikho ukuthi mhlawumbe umuntu uyabe esesenza mhlawumbe imisebenzi yobunyama kodwa kuyindlela yokuzi zimazisa, kufaka njalo isithunzi emuntwini obusayo okwenza labaphethweyo labo bakhangele ngelihlo lenhlonipho ngesithunzi esiyabe sembethwe ngulowo obusayo, kwenza nje abantu bamkholwe, bamethembe futhi kukho konke akukhulumayo.
Kanye lezinhlelo azimisayo. Yikho nje sinanzelela ukuthi inkosi uLobengula wasigcina isithembiso lesi waze wahamba laso ethuneni lakhe, isithembiso semfihlo okwenza lengcwaba lakhe langaziwa muntu. Yindlela emqoka le eyayisakha impilo kanye lobuntu lapho kukhangelwa ukuphila kwamakhosi, okwakudala njalo impilo ezothileyo kulabo bantu.
