uMthunywa
Ophezulu Stinta
Siqhubeka ngemibhalo engalotshwanga, ilifa esalitshiyelwa ngabendulo ukuze lathi sililondoloze, sigcinele izizukulwana ezilandelayo lazo zinambithe kulo.
Kumalanga adluleyo sike saxoxa ngengoma ezitshiyeneyo, sinanzelela ukuthi kule ngoma ezihlatshelwa ngabesilisa kube lengoma njalo ezihlatshelwa ngabesifazana, kuyasinceda-ke lokhu nxa sibhala indaba yokuzibumbela kumbe sesibhala ezethu ingwalo, singaxubanisi okwesilisa kanye labesifazana.
Zikhona njalo ingoma zohlobo, losizi. Ngesikhathi sempi, lapho sekuyiwa empini, kwakuvuka isimo esibuhlungu okwamagama, amabutho ayetholakala esehlabelela ingoma zosizi sebezinikele kumumo okwakumele babhekane lawo.
Kulezi ngoma abesifazana babengekho, kwakungabesilisa kuphela, ingoma yakhona yayivunywa yinduna yebutho, eyiyo okwakumele ikhokhele kikho konke okwasekumele babhekane lakho, ibutho-ke laliyivuma ingoma ngokuvumelana lenhlelo zempi, ukuzimisela kwabo empini okwasekumele babhekane lakho, ingoma yosizi le kwakuyindlela yokubahlanganisa ndawonye, ukuze bafeze injongo eyodwa ababebhekane layo, ukulwa ndawonye banqobe ndawonye.
Sinanzelela ukuthi ingoma zosizi zazisondeza abantu abalenhloso efanayo, babone ngaso linye, babambisane ngokufanayo njalo.
Lapho ibutho selehlulwe empini, lali ngayilahli ingoma yalo, yiyo njalo eyayibika besesekude le ukuthi ibutho lalinqotshiwe, labasekhaya bahle bazi, ukuthi kwakumele babamukele njani ekufikeni kwabo ekhaya, isitsho sabadala siyatsho nje ukuthi inyathi elimeleyo yingozi emangalisayo, ibanjwa ngonanzelelo, kufana-ke lebutho elizibika ngengoma yosizi.
