uMthunywa
Ziqoqwe zahlelwa nguP Mpofu
Imbongi – nguS Mkandla
Isihloko senkondlo – Amanz’amunywana
Isihloko senkondlo le siyisingakethiso, sifanekisa utshwala lamanzi, kodwa la amanzi amunywana. Amunyu kawafani lamanzi la esiwajayelayo anathwa ngumuntu wonke. Njengoba sengitshilo ngaphambili amanzi amunywana la butshwala. Imbongi kayihle ithi bhadla ngabo utshwala lobu kodwa isitshengisa okuvame ukwenzakala emakhaya.
Sizwa uSokhaya ethi kakubizwe umntwana walapha ekhaya uNtombikayise emtshela ukuthi kakhuze amatsiyane.
Amatsiyane ajayele ukuthi abelokhu eqhwayaqhwaya duze labantu. Nanku-ke lapha kuthiwa uNtombikayise kuthiwa kakhuze amatsiyane lawo. Uyazekelisa uSokhaya ethi okungamatsiyane lokho kuyabe kuhlupha kufuna ukudla amabele kungathi kuyake kuwalima kodwa bona bezakubulala babuye batshebe ngakho.
Akumangalisi lokhu ngoba ozidlela amabele (onatha utshwala) ufuna lenyama. Kungenzeka ukuthi uSokhaya lo athi kubulawe inkukhu batshebe ngayo. Uyaqhubeka lo umuntu esethulela uMthwakazi abona kusenzakala. UMthwakazi kalabandlululo okutsho ukuthi kakhethi mhlobo ukhetha izinto ngokufanayo. UMthwakazi utshengiswa abantu befukuzela, begijima ngezisu ezigcwele utshwala zisiya eMpelamandla okutsho ukuthi besiya lapho okulotshwala khona.
Kuthiwa kuseMpelamandla ngoba utshwala budaka abantu baswele amandla. Opheke lobo tshwala lapha nguMaVundla njalo bunengi ngoba kuthiwa ngobokuphala izikhumba. Buyabe bubunengi lobo obokuphala izikhumba. Bumnandi lobo tshwala ngoba lowo obuzwa ngenkezo nje kuphela kuthiwa buyamomisa. Ngamanye amazwi kutsho ukuthi lowo obuzwe kancane benza ahle afune ukunatha obunengi bakhona ngoba obulutshwane abumkhuphi ukoma.
Lobo obulutshwana utshwala umuntu ayabe ebunathe ethi yinzwisa benza afune obunengi ngoba kuthiwa buphendla indlela yamaqhaga ngoba ucina esenathe obunengi. Isiphithiphithi esenziwa ngabantu besiya etshwaleni sinjengalesiya esibonakale enyosini iphakathi kwentuthu. Nangu loZulu laye eyabuzela laleyonyosi isingumfana ukuthi iyabe isisala phansi ngoba uZulu eyabuzela ngokwedlulileyo.
KwaZulu kusavutshwa ngoludala, “Lamanz’ayesehlis’izinyama”. Lokhu kutsho ukuthi ilizwe lisakhile kwaZulu kwakuthi nxa kuhlatshiwe kudliwa inyama yehliswe ngotshwala, yayingadliwa kodwa kungelatshwala inyama. Into ekhona khathesi yikuthi utshwala lobu sebusehlisa izimilo ngoba abantu sebesenza izinto ezingalunganga ngoba benathe utshwala. Ngalokho-ke izimilo zabantu buyazehlisa utshwala.
Iyakhala-ke imbongi ngokufa kwelizwe ebelilihle abantu beziphatha kuhle kungekho ukubuswa butshwala. Iyabuza imbongi ukuthi akuphi amajaha lezintombi zezolo ababeziphethe kuhle belobuntu, hatshi lokhu osekubonakala khathesi osekulabofeleba, izigebengu phela, labantu abaphambeneyo okuthiwa “sesibona lezedlula zisengwa.”
Imbongi ikhala ngeSimanje esesone izingane zakhathesi njalo ileqiniso lakho lokhu yikho ifunga ngamaphansi, amadlozi kaZulu ukuthi iSimanje sesone izingane zikaZulu.
