uMthunywa
Imbongi nguJerome R Nyathi
Kule inkondlo imbongi ikhuluma ngomuntu ophakathi kothando olukhulu ekhuluma lesithandwa sakhe, eqinisekisa lolothando. Singakuthandabuzi ukuthi kungaba yiyo imbongi ekhuluma lesithandwa sayo. Imbongi ikhuthaza isithandwa sayo ukuthi sithathe inhliziyo yayo. Inikela inhliziyo yayo kusithandwa sayo isithi iyisiwiji sona esimnandi ngokuhlabusa. Imbongi ithi kasiyithathe leyonhliziyo sizwe ubunandi siwele.
Umuntu engadla into emnandi uyathatheka yikho nje imbongi ithi isithandwa sayo asizwe isiwiji siwele. Leso siwiji esiluthando lwaso uthi kasipheli lobo bunandi ngoba yiso izolo, lamhla lekusasa. Sekungathi imbongi ithi singunaphakade. Isithandwa leso sikhuthazwa ukuthi simumuze lolothando olumnandi okoluju. Leso sithandwa kuthiwa kasimunye sikhohlwe ukuthi ubumunye bungamuka endaweni yobunandi.
Imbongi ikhuthaza isithandwa salo esibiza ngelikaGugu ukuthi athathe igugu labo. Njalo kumele ukuthi angazigubi kulelo gugu ngokuguga masinyane. Imbongi kayiselamazwi ngoba isikhangwe yibunandi lobo nje. Nxa ikhangela isithandwa sayo ithi ibona amehlo agobhoza uchago. Lokhu kutsho ukuthi amehlo ewabonayo amhlophe nke ayinduduzo kuyo. Sihle isithandwa sembongi lesi ngoba nanku ikufakaza ngesibabazo esithi, “Umuhle mntwan’omuntu ya!”
Imbongi ifaka inkulumo yencwadi engcwele okutshengisa ukuthi iyakholwa kuNkulunkulu ngoba iyabuza ukuthi.
“Kanj’utheni yen’owembulelweyo?” Owembulelweyo ngobonisiweyo ngezokholo, osevuleke amehlo obunyama wabona imimangaliso kaNkulunkulu. Ngenxa yokuthi baphakathi kothando imbongi ithi akuhlale kunjalo babesezulwini kuwonalo umhlaba kube sengathi kukwakhe. Lokhu kufakaza ukuthi imbongi lesithandwa sayo bathandana kakhulu sekungathi basezulwini lona elikholwa ngabembulelweyo kube kanti bona bakuwonalo umhlaba.
Lukhulu uthando lapha ngoba imbongi ikhumbula okwedlule ngothando lwabo isibuza isthandwa sayo ngezifungo esenzileyo. Siyezwa isifungo esenziwa yisithandwa sembongi esathi siyayithatha ibe ngowaso kundawo ezinengi ezinjengezintaba lakuzifudlana zempilo. Ngenxa yothando olukhulu elalo kusithandwa sayo, kayilaqiniso imbongi ngalokho yikho nje ibuza ngomkhosi ithi, “O! Kambe kungangifanela mina na?”
Ngakwelinye icele okungathi isiziphikisa iyasibonga isithandwa sayo. “Ah! Ngiyakubonga mntwan’omuntu, O, ukufa nje kuzasehlukanisa ngoba kulesikhwele.” Iyakhala imbongi ithi ukufa nje yikho okuzabehlukanisa ekuchaza angathi ngumuntu olesikhwele ongafuni abantu bathandane. Kodwa yona imbongi ithi izakwenza okungejayelekanga ngoba ithi yona izakufa lesithandwa sayo ukuze sona sithabe. Bazathandana kakhulu, lokhu kufakazwa yisitsho esithi, “Amathe lolimi ngiyakutshela.”
Iyaphambili imbongi ifaka imigoqo yokuthi bengaphumi kuso lesithandwa sayo. Ipha isithandwa sayo isigombolozi njengomunye wayo. Itshela isthandwa sayo ukuthi kasizigombolozele ukuze siyigombolozele phela imbongi. Idlala ngamabala imbongi itshela isithandwa sayo ukuthi siziphathe, sihloniphe ukuze siyiphathe yona. Iyaziqhenya imbongi itshengisa uthando elalo lesithandwa sayo ngoba isitshela ukuthi simunye kuye laye amunye kuso ngokuthokoza.
