uMthunywa
P Mpofu
Ugwalo — Ugqozi Lwezimbongi
Imbongi ngu S N Thebe
Isihloko senkondlo – Thixo Ngipha Amandla
INKONDLO esingayo lamuhla ingumthandazo. Imbongi uThebe ithandaza kuNkulunkulu, uMdali wayo, imbiza ithi nguSomandla.
Ibizo elithi Somandla litsho umnini mandla wonke. Iyacela-ke imbongi ukuthi keze uSomandla azoyihlenga kungxaki ezimbalwa eziqambe lapha.
“Izitha zam’uma zingihanqa, Lezono zam’uma zingihanqa, Izilingo zomhlabazingigwegwa, Iz’nothi uma zingihleka, Iza, Somandl’ uzongihlenga.”
Ulamandla uSomandla ngoba nanku imbongi ithandazela ukuthi kayihlenge kuzo zonke lezinkinga ezibethe lapha.
Iyathandaza imbongi kuSomandla ukuthi ayiphe amandla okuphila. Ukuphila lamhla, kusasa, laphakade. Iyakuveza imbongi ukuthi olamandla angako, okufeza zonke izikhalazo zakhe nguSomandla qha kakho omunye olamandla okwenza lokhu.
Iyasitshela njalo ukuthi uSomandla liDwala lantolontolo, okutsho ukuthi liDwala lakudala.
Lokhu lencwadi engcwele iBhayibhili liyakufakaza lokhu. Akuthandabuzeki ukuthi imbongi le likholwa elimthembayo uSomandla umdali wayo.
Kayithandazeli yona yodwa imbongi, kodwa labanye abantu abanengi iyacela kuSomandla ukuthi labo bahlengwe ebubini babo. Iyakuveza imbongi lokhu lapha etshela uSomandla wayo ukuthi zinengi inhliziyo ezilezilonda. Lezi lazo zinhliziyo ezidabukileyo ezidangeleyo.
Iyacela imbongi uMdali akazihlenge inhliziyo ezinjalo. Lemphefumulo layo kuthiwa minengi eduhayo.
Ngokufanayo imbongi icela uSomandla, embiza ngokuthi, “Mhlekazi weZulu” akayilonde layo leyo mphefumulo. Ngilethemba siyakunanzelela bafundi ukuthi uSomandla ubizwa ngamagama amanengi kodwa emunye. Munye uMdali lanxa ebizwa ngamabizo amanengi. Iyacela imbongi ukuthi lomoya okhumbula kude kawududuze uMduduzi, uS’makade saphakade.
Siyakunanzelela ukuthi lapha uSomandla usebizwe ngamanye amagama uMduduzi lo S’makade. US’makade kutsho ukuthi akalasiphelo umi njalonjalo.
Konke okusemhlabeni kuphila ngentando kaSomandla.
Imbongi ithi: “Ziyaphila, ziyandiz’izinyoni zezulu, Ziyabonga, ziyaqolotsha izinyamazana zakho, Ziyathaba, ziyatotob’izinanakazana zakho.” Zonke izidakwa zithokoza ngendlela ezitshiyeneyo ngendlela ezihambelana lazo.
Iyacela imbongi ukuthi uSomandla kayifanise lazo izidalwa zikaSomandla laye uSomandla amfundise intando yakhe. Iyavuma imbongi ukuba iyisoni esingaboniyo izinto zakomoya. Iyacela-ke imbongi ukuthi uThixo ahole isiphofu esinguye. Uyazisola yikho sekungathi iyazicunukela ngoba ithi iyisiphofu ndini. Iyacela imbongi ukuthi uThixo kaholele lompofu onguye. Umpofu ngoba engakholwa kuSomandla kungasikho ukuthi umpofu okobuyanga kumbe ukuswela.
Kuyizwisa ubuhlungu kakhulu lokhu imbongi ngoba nxa izihlola ibona iyangekile kakhulu ngokwasemoyeni yikho icela uSomandla, uMduduzi ukuthi yesule izinyembezi zingaweli phansi ngoba nanzi inyembezi sezigobhoza. Imbongi ingulo umuntu othandaza aze afikelwe zinyembezi nxa ezibona ububi bakhe.
