uMthunywa
Wayne Ncube
KUKHANYA inhlanganiso ephethe umdlalo kanobhutshuzwayo kuleli eyeZifa iyehluleka ukuphatha kuhle abaqeqetshi, nanko phela uJoey Antipas usebeke phansi izikhali.
Umqeqetshi ongumhlonitshwa ozwayo lo utshiye umsebenzi ngoLwesithathu ekuseni (izolo), eqeda ukunikeza amaWarriors imiklomelo emithathu kumdlalo wabo leZambia kuliviki.
Ukukhalala kuka-Antipas kube yisimanga ngoba akula obecabangela ukuthi engajikela ithawulo ngesikhathi esevuse iqembu. Kodwa, ngokuhlaziya kwephephandaba likazulu, kubikwa kulabantu kunhlanganiso yeZifa abakade bengamfuni njalo bakhona abasekeli abafuqe ukuthi lumqeqetshi akhalale.
“Sengitshiya,” kutsho uAntipas ngoLwesithathu.
Iphephandaba likazulu lincetshwe indlebe njalo ukuthi loba uAntipas ephazamiswe yisiphatho esibi esivela kuZifa lakubalandeli benguqu, iqembu lakhe iChicken Inn beselikhalaza ngokuthi kasatholi isikhathi sokukhankasela iligi.
Eyinye inkokheli yeChicken Inn ibike ensitha ukuba u-Antipas ubesechitha isikhathi ekumaWarriors endaweni yokuthi alolonge ama-Gamecocks.
“Nxa esetshiyile amaWarriors kuyinto enhle kithi ngoba umqeqetshi ubengasabonakali enkambeni yethu. Yisikhathi esinzima kumidlalo emibili eseleyo kuligi. Ukunqoba kwethu kungenza siyithwale inkezo njalo,” kutsho isisebenzi seChicken Inn.
IChicken Inn ingathatha inkezo nxa iCaps United inganqotshwa kumidlalo ezayo. Iqembu lakoBulawayo leli laba yintshantshu ngesizini ka-2017 liqeqetshwa ngu-Antipas.
Imizamo yokuxhumana loXolisani Gwesela isikhulumi seZifa yehlule.
