uMthunywa
YiNtatheli kaMthunywa
NGOMGQIBELO iTsholotsho FC yamukela izimbamgodi zeHow Mine kumdlalo womkhankaso wenkezo yeligi yeCastle enkundleni yeWhite City.
Okuhlabusayo ngomdlalo lo yikuthi iHow Mine iphethe abadlali abalobungcitshi obuphezulu kuleTsholotsho njalo izimbamgodi zibalelwa kumaqembu la alakho ukuthi ayithwale inkezo lonyaka. ITsholotsho yona isithole udumo lokuthi iyachumisa amaqembu anjengala nxa ithe yaguqula umdlalo.
Iziqholo zeZhwane zilabafana abangela dumo kangako kunguqu ngaphandle kukaJoel Luphahla loba nje engandisanga ukudlala mihla yonke. Inengi labadlali abangaphansi komqeqetshi uLizwe Sweswe basacathula kunguqu, kodwa angeke badelelwe kunkundla yeligi ephakemeyo.
Abagadli beHow Mine ababalisa uKuda Musharu, Charles Sibanda, Pasca Manhanga loHeritani Masuku bengadlula becimezile egedini leZiqholo.
Ngesiqubu esiphethwe ngabafana laba, kuzamele imvimbi zeTsholotsho zingene zibophe zaphelela enkundleni yeWhite City.
Ngemuva, umqeqetshi weHow Mine uKelvin Kaindu kethuswa yilutho.
Abagadli beTsholotsho kukhangelelwe ukuthi balibambe ibhola baphange ukulithela emambuleni ngoba umdlalo kaKaindu kuyaziwa ukuthi ubukhali ngesigaba sakuqala somdlalo.
Ngokuqathanisa amathimu womabili kungalane yePSL, Iziqholo zilenge emsileni ngemiklomelo eyisikhombisa kuthi iHow Mine isondelele eziphezulu ngemiklomelo elitshumi lambili. Labagadli beHow Mine babukhali ngoba ithimu le isibhoboze umambule okwesitshiya galombili, kuthi iZiqholo zikaSweswe zona sezihlohle kahlanu kuphela.
Lo ngumdlalo wakuqala phakathi kwamaqembu la lonyaka. UKaindu ubike ngokuzethemba ukuthi iTsholotsho uzayitshaya ayiphendulele.
“Umdlalo siwulungiselele sibili. Angifuni ukuqamba amanga ngokuthembisa okungekhoyo, iTsholotsho ngiyayihlonipha sibili. Esikuhlosileyo yikuthi siyingcwabe nxa kusenza.”
“Abafana bami babophe yonke indawo, njengemvimbi angikhulumi okunengi ngazo,” kutsho uKaindu.
Kweminye imidlalo, izimbamgodi iFC Platinum ezikhokhela iligi zidibana leZPC Kariba enkundleni yeMandava.
Abafana basachinsa inguqu yePSL iNgezi Platinum, basekhaya leqembu leHarare City kuthi iDynamos iqonda enkabazwe inxuswe yiChapungu ngoMgqibelo.
IHighlanders bekumele idibane leBorder Strikers kodwa umdlalo wedluliselwe phambili ngoba kuthiwa iBosso ilabadlali abatshibilikela iqembu lesizwe kumqhudelwano weCosafa Senior Men’s Challenge eNamibia.
Imidlalo yonke ngokugcweleyo:
NgoMgqibelo: Tsholotsho v How Mine (White City), Ngezi Platinum v Harare City (Baobab), Chapungu v Dynamos (Ascot).
NgeSonto: Mutare City v Bulawayo City (Sakubva), CAPS United v Triangle (National Sports Stadium)
