uMthunywa
YiNtatheli kaMthunywa
UMPHATHINTAMBO wezemidlalo uMakhosini Hlongwane usekhuthaze inhlanganiso yomdlalo we-wrestling kuleli ukuthi uphangise ilungisise isisekelo somdlalo lo kanye lokuthi iqoqe imincintiswano nxa ifuna ukuthi umdlalo lo uvunyelwe kuleli.
UHlongwange ukhulume lokhu ngesikhathi ebize umhlangano wokuthi azoxazulula inkinga ezibhekane lenhlanganiso le ngeviki edluleyo. Uthe kuyadingeka ukuthi kulungisiswe okuhluphayo ku-wrestling kuzigaba zonke.
“Iqiniso elikhona yikuthi umdlalo we-wrestling kuleli ubhekane lenkinga ezinengi. UHulumende uyakhathazeka ngalokhu ngoba kungumlandu wethu ukuthi siqondise okungabe konakele kulumdlalo, ikakhulu kusigaba sokufundela ukuwudlala lakubadlali asebeqeqetshwe baphelela.
“Sifuna ukulungisisa ukukhokhelwa lokufundiswa komdlalo lo kungatsha ezibalisa iZimbabwe Wrestling Federation leZimbabwe National Wrestling Control Board,” kutsho uHlongwane.
Umphathintambo lo uthe ngesikhathi engena emsebenzini, ibhodi yomdlalo lo yayingekho njalo wayengacabangeli ukuthi kukhona okwenzakalayo kulumdlalo.
“Umdlalo wethu lo kumele uphenduke ubelodumo njengakudala.”
Ubike ukuba umdlalo we-wrestling uzaqala ukudlalwa kuzo zonke izabelo zelizwe. Okwamanje abadlali bawo batholakala emadolobheni abalisa iBulawayo, Mutare leHarare.
UMthunywa ukhulume lophethe isikhundla sikamaqhuzu weSport and Recreation Commission uJoseph Muchechetere othe inhlanganiso yabo izenza konke okusemandleni ayo ukuthi incedise umdlalo we-wrestling.
“Saxoxisana lenkokheli zalumdlalo okwamahlandla edlula amahlanu, sihlafuna ngodaba lolu.
“Sifuna balungise isisekelo sombuso womdlalo ngoba leso esikhona sabunjwa ngo1994. Umdlalo lo kumele ukhule njengeminye esilayo kuleli,” kutsho uMuchechetere.
