Uhlekela esikhewini uMhlophe

08 Feb, 2024 - 00:02 0 Views
Uhlekela esikhewini uMhlophe UKenneth Mhlophe

uMthunywa

Fungai Muderere

UMGCINISIHLALO omutsha weHighlanders uKenneth Mhlophe usecele bonke abasekela leliqembu ukuthi bahlanganise amakhanda, babambane izandla ngoba sekuzasetshenzwa.

UMhlophe uveze lokhu kuliviki ngesikhathi etshayelwa ihlombe nguJohnfat Sibanda, okhitshwe kulesi isikhundla kumavoti aqhutshwe ngeviki elidluleyo. UMhlophe wathola amavoti angu-165 esehlula uSibanda ophume endaweni yesibili ngamavoti angu-104.

Amadoda la womabili ahlangene ngoMvulo lapho uMhlophe abonge uSibanda ngokuphatha isikhundla iminyaka emithathu edluleyo. UMhlophe uthe ubonga bonke abamfake esikhundleni, wacela ukubambana ukuze iqembu liqhube kuhle inhlelo zalo.

“Ngithatha lelithuba ukwamukela impumela yokhetho, ngibonge wonke umuntu ovotileyo waphatheka kukhetho lwethu. Yiso isikhathi sokubambana lesi. Iqembu lidinga ukuthi sibambane,” kutsho uMhlophe. 

Ekhuluma lentatheli yeZimpapers Sport Hub, uMhlophe ubike ngokujabula okukhulu “ngokuphiwa” isikhundla.

“Amalunga angivotele, ngiyabonga njalo ngizasabela. Kuyathabisa ukuthi umkhankaso wami uqhube kuhle njalo labantu beqembu bayangemukela.”

Uthe uzavuselela leliqembu libe yiBosso entsha. “Ibhola lakulezinsuku seliguqukile njalo lendlela amathimu akhokhelwa ngayo yahlukile kuleyakudala. IHighlanders layo kumele ilandele okufanayo. Isikhathi sokuxegisa sesadlula.”

Uthe esebenza ndawonye lamanye amalunga equla le-executive, uhlose ukwenza iBosso ibeliqembu lebhola elikhokhelwa njengebhizimusi.

“Phezulu kwakho konke okwangifuqa ukuthi ngikhankasele ukuba ngumgcinisihlalo yikusebenzela iqembu. 

“Amahofisi enkokheli zeBosso afuna abantu abacabanga ngokukhalipha. Inkokheli ezikhaliphileyo zingaqeda zonke indubo zeqembu.”

Ngokungena kukaMhlophe, iBosso ikhangelelwe ukuthi yenze kuhle lasenkundleni. IHighlanders yacina ukuthwala inkezo yeligi ngo2006.

Share This:

Sponsored Links