uMthunywa
YiNtatheli kaMthunywa
KULIMPELAVIKI kuphindelwa eMagumeni njalo kulandwe umdlalo ophakathi kweHighlanders lesitha sayo esiqina ikhanda iZPC Kariba kunkezo yeChibuku Super.
Zombili sezaphenduka zaba ngamaqembu athwalisana nzima kunguqu njalo imbali iyakuveza ukuthi akula engathi iqine kuleyinye.
Ukudibana kwazo akula ongenelisa ukuphupha impumela yomdlalo.
Ziphume embizeni eyodwa ngoMvulo kusenziwa uqoqo lwemidlalo yesigaba sama-semi-final enkezo ebalelwa phezulu kuligi yenguqu yakuleli.
Ukunqoba inkezo le kunikeza iqembu ithuba lokuthi liyedlala kumkhankaso we-Confederation Cup oqala ngomnyaka ozayo.
Ukufinyelela kweHighlanders kulesi isigaba kumangalise inengi ngoba lapho leli iqembu elisukele khona bekungathembisi ukuthi lingenza isimanga sokunqoba. Konke lokhu kuvele ezandleni zikamqeqetshi uHendrik Pieter de Jongh. Lo nguye umqeqetshi ofike waba yisithandwa sabadlali nanko benza konke akufunayo, ikakhulu ukuhlohla.
Ebuzwa ngamalungiselelo akhe kumdlalo weChibuku Super, umqeqetshi lo uthe ukhangelele ukunqoba ngoba yikho akulandayo koBulawayo.
“Ngeza lapha ukuzonqoba ngakho ngilolongela umdlalo leZPC Kariba, ngikhangelele ukunqoba. Inkezo le siyayifuna, kumele siyithwale kodwa ukuyithwala kutsho ukuba siyabe silungiselele. Ngiyayazi iZPC, iliqembu elethusayo phambili njalo lidlala ibhola elehlukileyo kulathi.
Okwenzakalayo kumidlalo yethu yeligi akungenelani lowenkezo, kungakho ukuhlasela kwethu kumdlalo kuzabuya ngezinga eliphezulu,” kutsho uDe Jongh.
Umqeqetshi lo uphange wathola ibizo elithi “Hlabangana” abalandeli beHighlanders bemuthi ubizwe “ngabadala” ukuzovuselela iqembu lomdabu wamaNdebele ngesikhathi iqembu likhanya selidonsa nzima egumeni layo.
Kwezinye ingatsha zenguqu yakuleli bayazibuza ukuthi lumqeqetshi unqoba ngani ngoba ufice abadlali abahlanganiswa nguMadinda Ndlovu owaze watshiya kungela tshintsho lokunqoba. UHlabangana uthethe isikhundla kwaqala ukuthi dlwe, abagadli sebelibona igedi.
Umgcinisihlalo weHighlanders uKenneth Mhlophe uthe abasoli lutho ngomqeqetshi lo njalo bayethemba ukuthi inkezo yeChibuku izakubo.
“Sizibona sizintshantshu zenkezo yeChibuku lonyaka. Umqeqetshi esilaye ulethe ukuzethemba kubadlali lakithi abakhokheli. Siyamqakezela ngalokhu asekwenzile.”
UMhlophe ukhuthaze abalandeli boqobo ukuthi bagcwalise inkundla yeBarbourfields ngeSonto.
“Ukuza kwethu ngobunengi kuzavuselela idlabuzane kubadlali. Asambeni siyegcwalisa inkundla ukuze sinqobe.”
Umqeqetshi laye uthe ukugcwala kweBF kuzakwengeza ukuzethemba kubadlali.
Umqeqetshi weBosso lo uphiwe isivumelwano sokusebenza esenyanga ezine nje.
