uMthunywa
YiNtatheli kaMthunywa
INKAMPANI esekela umdlalo we-boxing iBig Fish Promotions ibike ukuba ihlose ukuthi ilolonge abadlali abedlula ikhulu kuhlelo lwayo lokuvuselela lumdlalo kuleli.
Umqondisi omutsha wenhlelo zeBig Fish Promotions uSisa Moyo wazise ukuba bafuna ukuthi baphakamise i-boxing ngokuletha ubungcitshi kwezokuphathwa kwabadlali lokuqhutshwa kwemidlalo.
UMoyo ukhulume kanje esethula imibono yakhe ngesikhathi ephiwa umsebenzi omutsha lo kuBig Fish.
Uthe bahlele ukuthi imidlalo ezaqhutshwa ibukiswe ebulenjini be-social media ngemzamo yokusabalalisa isisindo somdlalo lodumo lwabadlali.
“Inkampani yeBig Fish ifuna ukuba yingcitshi kwezokuphathwa komdlalo we-boxing,” kutsho uMoyo.
“Sihlose ukuthi sivuselele umdlalo kwelakithi, ukuze uphenduke kusibanga sakudala.”
Umongameli weBig Fish uModicai Donga uthe isizatho sokukhethwa kukaMoyo kuze ngesikhathi behlose ukuthi baguqule indlela i-boxing eqhutshwa ngayo.
“UMoyo uzakuba yinsika yokukhula kwenkampani ngesikhathi sikhangelele ukukhulisa umdlalo sisengeza usekelo,” kutsho uDonga ongusomabhizimusi owake wabayintshantshu yalumdlalo esakhula.
Kusenjalo, phakathi kwayo yonke imidlalo encintiswa elizweni, umdlalo we-boxing usuthabise inkokheli zogatsha lwe-Sport and Recreation Commission ezibika ukuba ziyasuthiseka ngendlela umdlalo lo okhuthaza ngayo intsha yakuleli.
Umdlalo we-boxing usuvuke khwatshu lokhe iSRC yaphawula uhlelo lokuvuselelwa kwemincintiswano kuzigaba zonke olwe-Community Sports Development Programme. Ngaphansi kwaloluhlelo, abasakhulayo abasezikolo lalabo abangela misebenzi kodwa belethalenta, sebesenelisa ukuchitha isizungu ngokwakha umzimba lokuphendla amathuba agcweleyo. – @NkosieLegend