uMthunywa
Fungai Muderere
UNOZINTI wamaWarriors uDonovan Bernard ucabanga ukuthi bebengenza ngcono kumqhudelwano weFour Nations Tournament eMalawi.
IZimbabwe inqotshwe 3-1 yiKenya kumdlalo we-final ngoLwesibili, kwatshiya uBernard enwaya ikhanda ngokuyangeka, kulokho akuchaze ngokuthi kumdanise kakhulu.
Amanye amazwe akade encintisa yiMalawi, leZambia.
“Yebo, yikho lokho, sikhona isikhathi sokwehlulwa, kuphinde kubekhona isikhathi sokunqoba kodwa ngikholwa ukuthi iqembu lesizwe bekumele lenze ngcono. Ngidane kakhulu.”
“Ngicabanga ukuthi kube kuhle ukuba lesikhathi esinengi ndawonye njengabadlali bamaWarriors. Imidlalo yobungane le, isincedise ukuthi sibambane njalo siqondisise ukuthi abaqeqetshi bethu bafuna sidlale kanjani. Lokho ngicabanga ukuthi besingenza ngcono ngoba ithalenta linengi eqenjini lethu,” kutsho umdlalo lo othenjiweyo kuqembu leChicken Inn.
Unozinti lo ubeliqhawe kumidlalo yamaWarriors nanko wenelisa ukuvimba imbekwa emibili bedlala leZambia.
Abadlali abatshaya imbekwa ngababalisa uAndy Rinomhota, Walter Musona, Tinotenda Kadewere, Marshall Munetsi, Devine Lunga, Gerald Takwara, Bernard loDaniel Msendami.
UMusona, osedlalela iSimba Bhora loLunga, odlalela iMamelodi Sundown eyeSouth Africa, babanjelwa imbekwa yabo kodwa uMsendami nguye owaba lesibindi sokuthi ahlohle ibhola lokucina.
Abadlali bamaWarriors ababeseMalawi:
Unozinti:
Martin Mapisa, Donovan Bernard, Marley Tavaziva
Imvimbi:
Shane Maroodza, Divine Lunga, Gerald Takwara, Kevin Moyo, Teenage Hadebe, Peter Muduhwa, Munashe Garananga, Emmanuel Jalai, Jordan Zemura, Joey Phuthi
Abasesiswini:
Marshall Munetsi, Junior Makunike, Andy Rinomhota, Tivonge Rushesha, Tawanda Chirewa, Walter Musona
Abagadli:
Tinotenda Kadewere, Daniel Msendami, Tawanda Maswanhise, Macauley Bonne
