uMthunywa
Nkosilathi Sibanda
NXA ufuna ukubona ithalenta elisakhulayo kumdlalo wokugijima, qonda eWhite City lamuhla.
Izikolo zamabanga aphezulu esabelweni sakoBulawayo zizahlangana kulinkundla yomdlalo wokugijima, kumncintiswano weziqinti, owe-Inter Districts. Iziqinti zezikolo ezikoBulawayo zibalisa iReigate, Khami, Mbizo leBulawayo Central.
Kukhangelelwe ukuthi kubemnandi ngoba abantwana abazancintisa bazasekelwa yinkampani yezinkwa eyeBakers Inn.
Imncintiswano igoqela imjaho ye-100m, 110mh, 200m, 400m, 400mh, 800m, 1500m, 3000m, 5000m, 4x100m relay, 4x400m relay, ama-hurdles, long jump, triple, jump, high jump, javelin, shotput le-discus. Inkampani yeBakers Inn ibike ngosekelo lwayo kuzikolo zakoBulawayo kumdlalo wokugijima ngeviki edluleyo. Ithe iqembu labantwana abazamela isabelo sakoBulawayo lizasekelwa ngemali, langakho konke okungafuneka ukuze lincintise kakuhle.
Kulumncintiswano oqala kusasa eWhite City, kuzabunjwa iqembu elizamela iBulawayo Metropolitan Province kumncintiswano wezabelo ozaqhutshelwa esikolo seMosi oa Tunya High, eFolosi, esabelweni seMatabeleland North ekupheleni kukaMbimbitho.
Umphathisikolo obambe inhlelo zomdlalo wokugijima koBulawayo uSikhumbuzo Moyo ubikele iphephandaba likazulu ukuthi akubizwa ozwayo eWhite City.
“Izikolo sezilungiselele ukuthi zitshengise umphakathi ukuthi siphetheni kuthalenta lokugijima. Lo ngumncintiswano omkhulu odibanisa iziqinti zethu zonke edolobheni.
“Abantwana abazaphumelela bazakhethwa ukuthi babe yingxenye yeqembu elizakuya eFolosi, limele isabelo sakoBulawayo. Sinxusa umphakathi, ikakhulu abazali ukuthi baze ngobunengi babo ukuzosekela abantwana,” kutsho uNdlovu.
UNdlovu ukhuthaze ababalisi abaqeqetsha abafundi abagijimayo ukuthi balolonge abantwana ngendlela eyiyo ukuze benelise ukuyancintisa kakuhle eFolosi.
