uMthunywa
YiNtatheli kaMthunywa
UVEZE izinyo elimhlophe, waswela amaphiko umgcinisihlalo we-Bulawayo City uJerry Sibanda ejabuliswa yikuphakama kweqembu lakhe lisiya enkundleni ze-Premier Soccer League.
Lenhliziyo zihlalisekile kulithimu ngokunqoba kwayo ngenxa yokuthi kuze kwafikisa umdlalo wokucina ukuthi babizwe njengentshantshu kulandela ubukhulu bomncintiswano obukhona kumkhankaso weligi le.
Kumdlalo wokucina, Amakhosi Amahle anqobe 3-1 phezulu kwezisadalalayo eze-Arenal Movers.
Ukhulume engaqedi ngokujabula ayikho khona uSibanda.
“Sekuze kwafika ekucineni, kubonakala ukuthi ukusebenza kwethu nzima kuyabhadala. Sesiphendukile ku-PSL.”
USibanda uyijwayele inkundla yobukhokheli kuPSL nanko useke waba ngumgciningcebo weqembu leHighlanders, waphinda njalo wayikhokhela iCity ichinsa ukungena kunkundla yebhola eliphezulu.
Amakhosi Amahle aphethe umkhankaso wayo elemiklomelo engu-67, elandelwa yiTalen Vision ile 61.
ITalen Vision izikhiphe isiwiji emlonyeni ngoba yakhokhela ngokuvula isikhala semiklomelo eminengi phakathi kwesizini lalapho sekusele imidlalo embalwa. Leliqembu lahlohla amabhola amanengi kodwa laphazamiseka seliseduzane lokuthi likhokhele ngamandla. Kumdlalo wayo wokucina, iTalen Vision le eqeqetshwa nguMkhuphali Masuku encediswa nguMark Mathe inqotshwe nge 1-0 liqembu leMakomo.
Okwakhathesi, abadlali beBulawayo City basajabula kodwa inkokheli zabo zibika ukuthi kukhona okumele kulungisiswe eqenjini.
“Inhloso yethu singena kulumkhankaso siyenzile. Iqembu lizahlala phansi lihlaziye imidlalo yayo lisiyaphambili. Okumqoka yikuhlafuna udaba lwabadlali, usekelo lwemali labaqeqetshi,” kutsho uSibanda.
Umqeqetshi othole isicoco leBulawayo City ngu-Try Ncube, okukhangelelwe ukuthi abekhona kubhentshi lokukhuza abadlali, lanxa kungadingwa umqeqetshi olobungcwethi obedlula obakhe.
Akufihlwa ukuthi iBulawayo City idinga abadlali abatsha ngoba laba abakhona okwamanje sebekhulile.
Kwavela kwaqhinqwa isililo ngokuthi iqembu leBulawayo City kukhanya lizabaleka lemiklomelo yonke libhekise kunguqu ezwayo eyePSL ngomnyaka ozayo.
Ngokudlala kwethimu yeBulawayo City, kubikwa amakhansila kamanisipala wakoNtuthu asethembise ukuthi azaphosela imali kubadlali nxa bengaphumelela ukuya kuligi yePSL.
Abafakazi abaqotho abakukhomithi eqhuba inhlelo zeBulawayo City bancwebe intatheli le indlebe ukuthi sekulemali esibekwe eceleni ezakuya emabhanga abadlali.
