uMthunywa
YiNtatheli kaMthunywa
UKAPUTENI weBantu Rovers uBukhosi ‘‘Zaku’’ Sibanda usengene umango wokuyadlala eSouth Africa nanko usesayine kuqembu le-Ubuntu Cape Town FC elidlala ku-Division One wakulelo.
USibanda uvume ukudlalela ithimu le okwamasizini amathathu. Umdlali lo usuka kuqembu leBantu Rovers eligijima kuligi yeCastle Lager engumdlali ohlohle amabhola amanengi ukwedlula bonke kuligi le.
Ubesehlohle amabhola alitshumi.
Ekhuluma lephephandaba likazulu esendleleni yokuya eKapa, uSibanda ubike ukuthi uyajabula ngokuthola iqembu laseSouth Africa ngoba kulapho abona angathi engagcwalisisa amaphupho akhe okuyadlala e-Europe.
“Sengisukile kuBantu Rovers. Iqembu engiya kulo libizwa ngokuthi yi-Ubuntu Cape Town FC njalo likuligi yeFirst National Division,” kutsho lumdlali owaqala ukuba ngukaputeni ngesizini ka2014 eleminyaka elitshumi lasithupha yokuzalwa.
Ngesizini edluleyo uSibanda uzakhele ibizo elihle ngokukhokhela iTshintsha Guluva kunkundla zika-Division One, wenelisa ukubhoboza umambule ngamabhola ancedisa ukuthi iqembu lakhe lihlangane lamathimu amakhulu kuligi yeCastle Lager.
Umaqhuzu weBantu Rovers uWilbert Sibanda uthe loba bemfisela inhlanhla umdlali wabo, bazwa ubuhlungu ngokusuka kwakhe ngoba kuzakuba nzima ukuthi kube lomdlali ongavala isikhala asitshiyileyo.
“UBukhosi ubengumdlali wethu esimthembileyo. Ukusuka kwakhe kuBantu Rovers kutshiye isikhala esikhulu kakhulu. Loba kunjalo, lesi yisikhathi sokuthi abafana abasacathula eqenjini bazitshengisele ukuthi bami ngaphi ngobungcitshi.
“Ukuzimisela kwakhe kuBantu Rovers kuyancomeka sibili. Simfisela inhlanhla kwelakusasa lakhe kunguqu,” kutsho umaqhuzu lo.
Umbiko okhitshwe yihofisi yezokuxhumana yeBantu Rovers ibike ukuba uLucky Ndlela uzaphiwa isikhundla sikakaputeni.
