uMthunywa
YiNtatheli kaMthunywa
OWAKE wadla ubhedu esadlala inguqu ekuHighlanders uThulani “Biya” Ncube usephenduke njalo lapha akhulela khona ngokuncedisa ukuvulela abafana lamankazana asakhulayo amathuba ngaphansi kohlelo lwakhe lwe-Biya4 Academy Soccer Camp.
Kukhangelelwe ukuthi ihlekana labadlali bakoBulawayo abazakhethwa ukuthi babeyingxenye yalabo abazalolongwa okuzwayo kumdlalo wenguqu enkundleni yeGrassroot Soccer Fifa Centre elokitshini leGwabalanda.
Ukubhaliswa kokhetho lwabasakhulayo lolu luvalwe ngeviki eledluleyo njalo kuhlelwe ukuthi bangene enkambeni mhlaka 16 Mpalakazi.
Kungxoxo abelayo lentatheli, uNcube uthe bazaqhubeka ngokulolonga abadlali abaleminyaka yokuzalwa esukela kweyisitshiya galombili kusiya ku-13.
Abantwana bazahlolwa, befundiswe ngabaqeqetshi bakuleli labanye abavela emazweni.
“Sesifikile kulesiyana isikhathi lapho esinxusa khona abantwana abalethalenta kumdlalo wenguqu ukuthi babeyingxenye yeBiya4 Academy Soccer Camp,” kutsho uNcube ohlala eMelika, owake wabangukaputeni weqembu lesizwe amaWarriors ngesikhathi esatshisa enkundleni.
“Ekulolongeni kwethu sizagxila kakhulu ekufundiseni abadlali ngokuqakathekileyo kumdlalo wenguqu okubalisa ukupasa ibhola, ukureyitsha lokuhlohla.
Siyazi, sizethemba njalo ukuthi umdlali uzaphuma kulolu uhlelo esefundile waphinda wajula emdlalweni.”
Okwamanje iqembu leBiya4 Soccer Academy elisekelwa nguNcube lincintisa kumbango wenhlanganiso yeZifa esabelweni sakoBulawayo.
Zifa
UBiya uke wasiza amaqembu emalokitshini asacathula ngokuwanikeza impahla yokudlala ngaphansi kwenhlanganiso yakhe eye-Biya and Friends.
Amaqembu la anikwa amakhiti okudlala, amabhola kanye lama-cones.
IBiya and Friends yasungulwa ngomnyaka ka2015 ngenhloso yokuthuthukisa inguqu kanye labadlali beZimbabwe.
Omunye wabacuphi owake wabizwa nguNcube, uRobert Cain oweMelika, wake wacebisa abazali abalabantwana abakhwabitha ibhola ukuba kungumlandu wabo ukuthi bavikele abatsha ekusweleni okokwenza.
