uMthunywa
Nkosilathi Sibanda
AMALUNGA eqembu leDynamos angamatshumi amane lasithupha agoqela abaqeqetshi, abadlali lenkokheli bahlolwe igcikwane leCovid-19 kwabanjwa oyedwa.
Isikhulumi saleliqembu uYvonne Mangunda ubikele iphephandaba likazulu ukuba ukuyahlolwa igcikwane kusehlelweni lwabo lokulungiselela ukuqala kwemidlalo.
Ngokunjalo, iDynamos isiqalile ukulolonga.
“Iqembu leDynamos elakuqala okubalisa abaqeqetshi, abadlali lenkokheli lihlolwe umkhuhlane weCovid-19.
Phakathi kwabantu abangu-46, oyedwa utholakale elalo igcikwane,” kutsho uMangunda ngoLwesibili.
UManguda uthe angeke atsho ukuthi ngubani ole-Covid-19 kodwa usekhuthazwe ukuthi ahlale yedwa athole ukusinda njengokuxwayiswa ngodokotela.
“Abaphathi bezempilakahle sebetsheliwe ngalokhu. Lo otholakale elegcikwane ukhuthazwe ukuthi ayengena ku-self isolation. Iqembu lonke limfisela ukuthi aphole ngokuphangisa,” kutsho uMangunda.
IDynamos ilungiselela ukuqala kweligi loba nje kungakavezwa ukuthi inkundla zizavulwa nini. I-Bulawayo City ngelinye lamaqembu kuleli elahlola abadlali labaqeqetshi balo. Kuleli iqembu kwabanjwa abantu abahlanu.
