uMthunywa
Ethel Ncube
ABAHLABELELI bePlumtree abadume ngomculo kamaskandi kukhangelelwe ukuthi bakhuphe ingoma entsha ekupheleni kwayonale inyanga.
UMthunywa ukhulumisane lomaneja wabahlaleli laba uHandsome Sibanda obike ukuba ingoma entsha izaphuma kuyonale inyanga, njalo abalandeli kabalungiselele ukujabula.
“UAphiwe loSobancane bazakhupha ingoma yabo ethi ‘Imidlinzo’. Ingoma le ikhuluma ngomuntu owenza izenzo ezimbi. Le yi-single kungakho nxa isiphuma sizayikhupha emakhasini ethu kunkundla zokuxhumana lapho esizazisa khona uzulu,” kubika uHandsome
Uqhubekele phambili echaza ukuba ingoma isilungile osokusele kuphela yikwenza i-cover okungasoze kuthathe isikhathi.
“Ingoma isilungile sekwenziwe konke, sesilinde i-outer cover kuphela okunye lokhu sokulungile. Inyanga le iphela ingoma siyayifaka emakhasini ethu okuxhumana abantu bathole ukujabula ngomculo omnandi.
Asihlaleni silindile balandeli imbiza isivuthwa isiyaphakululwa,” kuphetha uHandsome
