uMthunywa
Nkosilathi Sibanda
IQEMBU leHighlanders alikaze libuquthe ubuthongo nxa lilungiselela ukudibana leqembu leHarare City, ikakhulu enkundleni zeHarare, lokhe ithimu yesigodlweni yangena kuligi ephakemeyo.
Kulimpelaviki ziyaduma njalo phakathi kwazo zombili kumdlalo wesithathu weligi yeCastle Lager enkundleni.
IBosso isemangweni, iqonde ukuyalungisisa iphutha layo lokungahlohli elibonakale mhla ivakatshelwe yiMakepekepe.
Kulumdlalo amehlo azakuthi nhlo kumqeqetshi uBekithemba Ndlovu ngoba iHarare City ayimthathi kancane.
UNdlovu obizwa ngelithi “Super” ngabangane bakhe ebholeni, ulomsebenzi wokuthi alolonge inyawo zabagadli, bakwazi ukuhlohla. Engehluleka iHarare City izamphinda umphehlo wesizini ka2017.
Ngaleyo sizini, ngoLwezi, iHighlanders yadliwa 4-0 yiHarare City, kulindwe ukuthi iyethatha inkezo ngemva kokudonsa imidlalo engamatshumi amabili lantathu ingadliwa.
Yayingadleki iBosso lowomnyaka, kodwa ngokukhalala umsebenzi kukaKelvin Kaindu, umqeqetshi owayeseduzane kwakunguNdlovu.
Imbalwa imidlalo uNdlovu angayikhumbula lapho enqoba iHarare City.
Owangempelaviki ungaba ngowokuqala ozaletha injabulo, nanko phela iHighlanders ayikanqobi ngitsho.
Ngeviki edluleyo uNdlovu wazise ukuba badlalela ukuba zintshantshu ngakho akula iqembu abalidelelayo.
Umdlalo ozakhunjulwa ngabanengi ngowesizini ka2017 lapho iHighlanders iqeqetshwa nguErol Akbay eyanqoba khona 4-2 ngembekwa phezulu kweHarare City kunkezo yeZNA Charities ngoNtulikazi eBarbourfields.
Lokho angeke kwethuse iHarare City loba isamukela iBosso entsha, elabafana abasakhulayo.
Umqeqetshi weHarare City uMark Harrison uthe nxa esekhaya ukhululekile.
“Okwenzakalayo angilani lakho, sekwedlula. Engingakho khathesi ngomdlalo wethu leHighlanders yikuthi siyitshaye ekhaya lethu. Kwandise ukuthi amathimu atshintshe umdlalo nxa edibana ngemva kwesikhathi eside.
“Lonyaka sizatshova, sisebenze nzima ukuze sitshengisele ukuqina lokuzimisela kuyo yonke imincintiswano. Ngizagcizelela ngithi umdlalo wethu leHighlanders utshiyene njalo siwulungiselela sikhangelele ukunqoba,” nguHarrison lo ekhuluma lephephandaba likazulu ngoLwesibili.
Uqhubeke wathi: “I-Highlanders kumele iqaphele. Ngithanda ukukhuthaza abasekeli bethu ukuthi babuye ngobunengi baqhubekele phambili ngokuziphatha kuhle abakwenzayo.”
Imidlalo yeCastle Lager kulimpelaviki:
NgoMgqibelo:
-Harare City v Bosso (National Sports)
-TelOne v ZPC Kariba (Mandava)
-Chicken Inn v Dynamos (Barbourfields)
-Black Rhinos v Bulawayo Chiefs ( National Sports)
NgeSonto:
-Caps United v Chapungu (National Sports)
-Hwange v Ngezi Platinum (Colliery)
-Herentals v Yadah (Rufaro)
-Triangle v Manica Diamonds (Gibbo)
