uMthunywa
Mthokozisi Dube
UMQEQETSHI wabafana abatsha kuligi iBorder Strikers uSaul Chaminuka ufunga uyagomela ukuthi iqembu leChipangano iHwange ingaphuma lemiklomelo emithathu.
Amaqembu la adibana kumdlalo wesithupha kuligi enkundleni yeMaglas. Iqembu leBorder Strikers alikatholi imiklomelo loba nje lidlala kuhle. Emidlalweni emihlanu eseliyidlalile selihlohlwe amabhola ayisithupha okuveza ukuba leliqembu lidlala ngcono noma nje lisabhekwe yisambane.
“Umdlalo weHwange yiwo engibona angani uzasinika inhlanhla yokuthola imiklomelo. Imidlalo esesiyidlalile besinqontshwa kodwa sidlala kuhle,” kubika uChaminuka.
UChaminuka ukhalakhale ngokuthi akaboni isizatho sokuthi kuthiwa uyabe edlala esekhaya kulandela ukuthi uyabe ehambe umango omude kakhulu ukudlula iqembu okuyabe kuthiwa limvakatshele.
“Siliqembu elincane njalo inkundla yonaleyo esolwayo ngibona angani ingcono kuleVhengere.Lokhu kutsho ukuthi kwenzelwa ukuthi omunye umuntu athole imali ukudlalela kwethu eMaglas,” kubika uChaminuka.
UChaminuka ubike njalo ukuthi ukuthi yona ngokwayo inkundla yeMaglas ayiqedakali eyabo ingcono.
“Abahlaziya imidlalo bangatsho abangakutsho kodwa emidlalweni esayidlalayo akulamdlalo okuthiwa sasikhulelwa.Sasibulawa yikuhamba umango omude okwabangela ukuthi abadlali bethu bafike bevuvuke inyawo,” kuchaza uChaminuka.
UChaminuka ubike ukuba ulomkantsho wethimu okholwa ukuba mhla izaqala ukuthola imiklomelo kuzakuba nzima ukuthi amaqembu amakhulu ayinqobe.
“Umdlalo wethu leCaps United sasidlale kuhle kodwa iCaps yasebenzisa abafana abadobha amabhola ukuba bafihle amabhola ngendlela yokuqeda isikhathi,”kubika uChaminuka.
IBorder Strikers yadliwa 1-0 yiMakepekepe ngeviki ephelileyo.
UChaminuka uqhubekele phambili ebika ukuba abasekeli beqembu bayehluleka ukuyafika eZvishavane okusuka kuthamule ithimu le ngemali.
“Nxa siseMaglas sidlala inkundla ibetha umoya ngoba abasekeli bethu abenelisi ukusilandela.Imali yonke iphelela kundleko.” Kuphetha uChaminuka.
