uMthunywa
SONKE siyakwazi ukuthi inkulumo isuke ingabi ngepheleleyo uma singekho isenzo. Isenzo silandisa ngokwenziwa yinhloko yomutsho. Kuyenzeka ukuthi kwesinye isikhathi umutsho uveze ingqondo epheleleyo singekho isenzo.
Ake sihlolisise imitsho elandelayo: 1. Ugogo uyadla. Ihatshi liyathimula. Umfana wosa umumbu.
2. Uyise ngumfundisi. Ihatshi yinyamazana. Uyadla, liyathimula, wosa. Wonke la amagama ayizenzo yikho-ke imitsho elazo iphelele. Imitsho eku 2 layo iphelele lanxa singaziboni izenzo. Amagama ngumfundisi, yinyamazana ngamabizo athe ukuguquka kancane asesenza umsebenzi wokulandisa.
Amagama ayizilandiso ayimihlobo emibili: 1. Kukhona izenzo 2. Kukhona incezu zenkulumo ezithize eziguquliweyo ukuze zenze umsebenzi wokulandisa. Nxa siguqula incezu ezithize zenkulumo ukuze zenze umsebenzi wokulandisa sizibiza ngokuthi yizibanjalo lezo ncezu zenkulumo.
Izibanjalo zingakhiwa ngalezincezu zenkulumo: amabizo, izabizwana, izichasiso Kanye lezandiso.
Ukwakhiwa kwezibanjalo emabizweni
Kubizo umuntu elikusigaba 1 isibanjalo ngumuntu. Umama 1a isibanjalo ngumama. Isigaba 2 abantu isibanjalo ngabantu. Kubizo umlilo elikusigaba 3 isibanjalo ngumlilo. 4. Kubizo imithi elikusigaba 4 isibanjalo yimithi. Kubizo ubuhlalu elikusigaba 14 isibanjalo yibuhlalu. Emabizweni aqalisa ngo –i- sehlisa iphimbo siqalise ngo –y.
Emabizweni aqalisa ngo –u lo –o sehlisa iphimbo siqalise ngo-ng.
