uMthunywa
YiNtatheli kaMthunywa
IZIQHOLO zeZhwane, iTsholotsho FC ziyathokoza njengoba sekusele amalanga ambalwa ukuthi ziqabuke inkundla zeligi ephakemeyo eyeCastle PSL.Ukulinda kweTsholotsho ukuthi itshibilike lengcitshi zenguqu yakuleli usuphela. Iphupho leTsholotsho lagcwaliseka nyakenye ngokunqoba kwayo amaqembu wonke eligi ka-Division One kumhlubulo ongezansi yelizwe.
Kusukela ngoMpalakazi ka2014, abasekeli balithimu labo bebelinde impelaviki le ngelihlo ebomvu. Iziqholo zeZhwane ngezakuqala kungena kuPSL phakathi kwamaqembu wonke adabuka emaphandleni.
Kuliviki, iphephandaba likazulu lixoxe lomqeqetshi uLizwe Sweswe obike ukuthi amanye amathimu azadela inkani ngokudliwa.
“Siyilindile iligi yeCastle. Iphupho lethu seligcwaliseka okutsho ukuba sesifikile emncintiswaneni omkhulu. Inkuthazo esilayo ngevela kubasekeli bethu ukuthi sinqobe, senqabele ukuxotshwa kuligi ngomnyaka wethu wakuqala siku-PSL.
“Amalungiselelo aqhuba kuhle. Okuthabisayo yikuthi sibatholile abadlali ebesibafuna. Ungakhangelisisa, iTsholotsho FC ayizange izihluphe ngokuthenga abadlali labo okuthiwa balodumo. Sizadlalisa abafana esasilabo kusukela siqala ukulwela ukungena kuPSL,” kutsho uSweswe.
Umqeqetshi lo uphezulu kokufundela isithupha seCaf A licence njalo uqine ngokutshayela ihlombe inkokheli labanikazi beTsholotsho FC ngosekelo abamnika lona esadalala lethimu emahlangeni kaDivision one.
USweswe uncediswa nguSithethelelwe ‘‘Kwinji 15’’ Sibanda. Umsekeli lo ngowesifazane wakuqala ukuqeqetsha ithimu yabafana eZimbabwe.
ITsholotsho izasebenzisa inkundla yeWhite City njengekhaya layo kuze kuyefika uNtulikazi. Kusukela lapho, ithimu le izatshintshela kubo enzikini yeTsholotsho.
Inkundla entsha le kubikwa isiqalile ukwakhiwa.
Kusenjalo, uKennedy Ndebele umaqhuzu wePSL wazise umphakathi wenguqu ukuthi iligi isizaqalisa ngeviki ezayo mhlaka-21.
“Iligi yethu yeCastle PSL isizavulwa ngempelaviki ezayo mhlaka-21 Mbimbitho.”
Ngokutsho kwePSL, iligi bekumele iqale kulimpelaviki. UNdebele utshele uMthunywa ukuba ilanga lokuvalwa kokuthengwa lokuthenga abadlali ngumhlaka-25 kulinyanga.
