uMthunywa
YiNtatheli kaMthunywa
NXA iqembu leDynamos lizimisele ukunqoba ngeSonto phezulu kweHighlanders kuzamele libone ukuthi litshaya amabhola angeke abanjwe nguAriel Sibanda.
Unozinti lo okwamanje usehamba phambili kwabonozinti bonke ngokwenelisa ukuvimba amabhola.
USibanda usevimbe kwaqakeza uzulu obukela ibhola nsukuzonke, okuyikhona okumenza abengumdlali othenjiweyo kuBosso.
Umsekeli wakhe uProsper Mathuthu angeke awubambe umthwalo oza leDynamos ngoba usacathula kumidlalo emikhulu njengale.
Ngesizini edluleyo uSibanda, odume ngelithi ‘Mangoye’ enkundleni ngenxa yokweqa kwakhe evimba igedi, uqede imidlalo elitshumi engahlohlwa edlale amahlandla alitshumi lasitshiya galombili. Kumdlalo wokucina iHighlanders ithekelele eTriangle, unozinti lo waqeda umdlalo eliqhawe ngemva kokuvimba imvema zamabhola.
Kulisizini, uSibanda usekhuthe imidlalo yeBosso emithathu kulandela ukuphiwa kwakhe ikhasi elibomvu ngunompembe.
Ekhuluma lephephandaba likazulu ngoLwesibili emini, unozinti lo uthe iDynamos ayisoke idlule kuye.
“Umdlalo wangeSonto leDynamos unzima kodwa njengomdlali osebone konke, angivumi ukuthi ngizahlohlwa. Indlela engivala ngayo ivela ekuthini ngiyalolonga nsukuzonke lomqeqetshi wami uTembo Chuma. Umqeqetshi lo ungikhuthaza ukuthi ngisebenze nzima,” kutsho uSibanda.
