uMthunywa
Olwalotshwa ngu B Makhalisa
KULELI viki sizaxoxa ngezifundo ezitholakala egwalweni lwethu Impilo yinkinga.
Ugwalo lolu luqukethe izifundo ezinengi ngempilo jikelele. Lungumfanekiso oqotho wempilo esiphila kuyo, njengoba lubukeza impilo eqotho.
Siyananzelela kabanzi ukuthi udubo kaluqoqodi, lokhu kusifundisa ukuthi sihlale silindile ngoba kasikwazi ukuthi impilo isiphatheleni. Sibona uNgonyama esezithola ethwele umthwalo onguKhotso kungasela lapho ayengamlahlela khona, wayengahlelanga nje ukuthi impilo yakhe uzazithola ebhekene lomthwalo ofana loKhotso. Kuyisifundo-ke ukuthi impilo ayigabelwa, umuntu athabe kukhona okungavuka sekukhona.
Siyafunda njalo ukuthi induku ayakhi muzi. Lapha sifunda kakhulu ukuthi kungabalengxabano ebantwini kumele kukhulunyiswane njalo abantu bangahlali bebophelene umoya, balakho ukukhumisana umlotha kungabi ndaba zalutho. Siyambona uNgonyama engakaze aphakamise isandla sakhe kuMaMsie phezu kwezigigaba zonke ayemenzela zona, aluba bekuthabathwa yisilisa sonke ukuziphatha kukaNgonyama imizi eminengi ibizalondolozwa.
Ukuhlonipha imisebenzi yethu yisifundo esikhulu kakhulu ebantwini abasebenzayo. Kuhle ukuthi sizithobe njalo lasemsebenzini leyo ukuze lathi sithole inhlonipho kuthi lemisebenzi yethu kube yiyo njalo esigcina ngokuphumeleleyo.Siyabona uNgonyama esala ukuyanatha loMaMsie ngoba enanzelele izinto ezilakho ukuwisa isimilo sakhe phakathi kwabantu, indlela aziphatha ngayo imnika isithunzi ebantwini.
Siyafunda njalo ukuthi okulempondo akufihlwa esakeni. Umuntu angenza konke afisa ukukwenza empilweni ethembe ukuthi ucatshile kodwa-ke ikhona imini eyisithutha lapho konke okuzaphuma egcekeni kuthi dandalazi kubesobala. UMaMsie ethandana loJoza kwakumnandi sengathi kuyimfihlo yabo bodwa kodwa ekucineni, uNgonyama laye uyifunda ngawakhe yena kanye okwakuthiwa ucatshelwe. Akulanto efihlwa kuze kubenini, umhlaba ulamehlo, konke kucacile emehlweni omhlaba. Kuhle-ke ukuthi umuntu enze okuhle izikhathi zonke.
Ukubonga empilweni yinto eqakatheke kakhulu njalo iyatshengisa ukuthi umuntu obongayo ngumuntu olesimilo njalo elobuntu. Ukufunda ukubonga ikakhulu kulabo abasakhulayo yinto enhle kakhulu, ukuthi umntwana akhule elenhlonipho yokubonga.
Amajodo awela abangela mbiza, ngalokhu-ke sifunda ukuthi lokho esilakho kumele sikubambe sikubambisise, sikuphathe kuhle ngoba labanye bayakufisa. Lokhu sikubona ngoBubbles owalahla ingane eyayikhaliphile okwamagama kukanti abanengi bayaziswela ingane ezifana loKhotso.